Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 230 Hüküm no: 178 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un menzilini eşi İbrahim’e satması Mahmiye-i İstanbul’da Keçeci Pîrî mahâllesinde sâkine Fâtıma bt. el-Hâc Mustafa nâm hatun tarafından husûs-ı âti’l-beyana vekîl olduğu zâtı ma‘rifet-i şer‘iyye ile ârifân el-Hâc Mustafa b. Ömer b [ve] İbrahim b. el-Hâc Mustafa nâm kimesneler şehâdetleriyle sâbit olan İmam el-Hâc Mehmed Efendi b. Süleyman nâm kimesne mahmiye-i mezbûrede meclis-i şer‘de müvekkile-i mezbûrenin zevci işbu râfi‘ü’l-vesîka İbrahim b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûrenin müteveffâ Süleyman Beşe veresesinden iştirâ eyleyip yedinde mülk ve hakkı olan mahâlle-i mezbûrede vâki‘ bir tarafdan el-Hâc Hasan Vakfı olan menzil ve tarafeynden Saliha nâm hatun menzili ve bir tarafdan Fâtıma Hatun menzili ve bir tarafdan tarîk-i âm ile mahdûd tahtânî bir bâb oda ve bir matbâh ve bi’r-i mâ ve bir mikdâr havluyu müştemil mülk menzilini tarafeynden îcâb ve kabûlü hâvî bey‘-i kat‘î ile zevci mezbûr İbrahim’e on beş guruşa bey‘ ve teslîm ol dahi iştirâ ve tesellüm ve kabûl eylediğinden sonra müvekkile-i mezbûre semen olan meblağ-ı mezbûru yedinden tamâmen ahz u kabz eyledi. Ba‘de’l-yevm menzil-i mahdûd-ı mezbûr zevci mezbûr İbrahim’in mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevm min-şehr-i Rebî‘i’l-evvel sene sitte aşere ve mi’e ve elf. Şuhûdü’l-hâl: Mücellid Mustafa Çelebi b. ( ), Abdi Çelebi b. el-Hâc Mustafa, Hüseyin b. Ahmed, el-Hâc Mustafa b. Ömer, İbrahim b. el-Hâc Mustafa, el-Hâc Yusuf b. Osman