Bab Mahkemesi 54 Numaralı Sicil (H. 1102 / M. 1691) cilt: 20, sayfa: 356 Hüküm no: 432 Orijinal metin no: [75a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Neslihan bt. Ömer’in Rodos’ta bulunan menzilini Hacı Hasan b. Ömer’e satması Fi’l-asl cezîre-i Rodos ahâlîsinden olup mahmiye-i İstanbul’da mahmiye-i Kirmasti mahallesi sâkinelerinden fahrü’l-muhadderât Neslihan bt. el-Merhûm Ömer Efendi nâm hâtunun zevci ve tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Hüseyin Efendi [b.] Cafer Hoca ve Mehmed Emin Çelebi b. Mehmed Efendi nâm kimesneler şehâdetleriyle sâbit olan fahrü’l-kuzât Ataullah Efendi b. Abdülbâki Efendi meclis-i şer‘-i şerîf-i enverde işbu şayka reislerinden işbu râfi‘ü’l-kitâb el-Hâc Hasan b. Mehmed nâm kimesne mahzarında bi’l-vekâle ikrâr-ı tâm ve takrîr-i kelâm edip, zevcem müvekkile-i mezbûrenin akd-i âti’z-zikir sudûruna değin silk-i mülkünde münselik olup yine cezîre-i Rodos mahallâtından Karabaş mahallesinde vâki‘ bir tarafdan Soli’nin mülkü ve ba‘zan Anbarcı mülkü ve bir tarafdan Kıymetzâde Mustafa mülkü ve bir tarafdan Aşcızâde Ömer Çelebi mülkü ve bir tarafdan tarîk-i âm ile mahdûd, münhedimü’s-sakf kârgir kemer üzerine iki bâb oda ve bir mikdâr havlu ve bi’r-i mâyı müştemil menzilini, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr el-Hâc Hasan tarafından îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bi’l-vekâle yüz yirmi yaldız altınına bey‘ ve temlîk, ol dahi ber-[vech-i] muharrer iştirâ ve temellük ve kabz ve kabûl ettiklerinden sonra semeni olan meblağ-ı mezbûr yüz yirmi yaldız altını bi’l-vekâle mezbûr el-Hâc Hasan’ın yedinden tamâmen ahz u kabz eylediğimden sonra menzil-i mezkûru mahallinde zabt ve tasarrufa bi’l-vekâle mezbûr el-Hâc Hasan’ı taslît eyledim. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Fahrü’l-müderrisîni’l-kirâm Ebûbekir Efendi b. Abdülbâki, Veysi? Kapudan b. Küçük, Mehmed Çelebi b. Cafer, Mehmed b. Hüseyin, Şeyh el-Hâc İbrahim [b.] Mustafa.