Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 259 Hüküm no: 213 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Ahmed’in eşi Mahmud Çelebi’den muhalaa usulüyle boşanması Mahmiye-i İstanbul’da Nişâncıpaşa kurbünde Efdalzâde mahâllesi sâkinelerinden zâtını ma‘rifet-i şer‘iyye ile ârifân Osman Bey b. Mustafa ve Receb Bey b. Şaban nâm kimesneler ta‘rîfleriyle mu‘arrefe olan Saliha bt. Ahmed nâm hatun mahmiye-i mezbûrede meclis-i şer‘de zevc-i muhâlı‘ı işbu râfi‘ü’l-vesîka Mahmud Çelebi b. İvaz nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr Mahmud Çelebi ile beynimizde hüsn-i zindegânemiz olmamağla bedel-i hul‘ olmak üzere kendüye medfû‘um olan sandal kablı sincab nâfesi müsta‘mel bir zenne kürkü ve bir neftî çuka zenne ferâcesi ve bir müsta‘mel hatâyî anteri ve bir işlik? ve bir müsta‘mel hamam gömleği ile zimmetinde mütekarrer ve ma‘kūdün-aleyh olan üç bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mahmud Çelebi ile muhâla‘a-i sahîha-i şer‘iyye ile muhâla‘a edip ol dahi minvâl-i muharrer üzere hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi el-kâtib, Mustafa Efendi el-mukayyid, Ali Beşe b. Mehmed, Sarrâc Mehmed Beşe, el-Hâc Yusuf b. Osman ve gayruhum.