Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 260 Hüküm no: 215 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. İbrahim’in, Yorgi v. Minol aleyhindeki gemi davasının reddedilmesi Bâ-imzâ-i hazret efendi Mahrûse-i Galata muzâfâtından Yeniköy’de sâkin sefîne reislerinden el-Hâc Mustafa b. İbrahim mahmiye-i İstanbul’da meclis-i şer‘de bin yüz dokuz senesinde mahrûse-i merkūmede nâibü’ş-şer‘ olan işbu bâ‘isü’l-kitâb umdetü’l-müderrisîni’l-kirâm Mustafa Efendi b. Ahmed Efendi tarafından husûs-ı âti’l-beyana vekîl-i müsecceli olan fahrü’l-müderrisîn Mehmed Efendi mahzarında üzerine da‘vâ ve takrîr-i kelâm edip bin yüz sekiz senesinde ben hacc-ı şerîfe gitdiğimde müvekkil-i müşârün-ileyh Mustafa Efendi vekîlim el-Hâc Ali nâm kimesne yedinde vedî‘a olan Karadeniz şaykası ta‘bîr olunur beş yüz guruş kıymetli on yedi buçuk zirâ‘ sefînemi gasben ahz ve Yorgi v. Minol nâm zimmîye teslîm edip ol dahi sefîne-i merkūme ile Karadeniz’e sefer edip sefîne-i merkūme mezbûr Yorgi’nin yedinde helâk olmağın hâlâ bi-hükmi’d-damân sefîne-i merkūmenin kıymeti olan beş yüz guruşu müvekkil-i müşârün-ileyhden taleb ederim, suâl olunsun dedikde, gıbbe’s-suâl vekîl-i mezbûr Mehmed Efendi cevâbında müvekkil-i müşârün-ileyh Mustafa Efendi sefîne-i merkūmeyi vekîl-i merkūm yedinden ber-vech-i muharrer gasben ahz eylediğini bi’l-vekâle inkâr etdiğinden mâ‘adâ işbu müdde‘î-i mezbûr el-Hâc Mustafa sefîne-i merkūmeyi yedimde olan işbu hüccet-i şer‘iyye mûcebince bundan akdem merkūm Yorgi v. Minol’dan vekîlim yedinden gasben ahz ve istihlâk etmişdin deyü da‘vâ ve da‘vâ-i mezkûresinden merkūm Yorgi ile iki yüz guruş bedel-i makbûza sulh olup sefîne-i mezbûreye ve âlâtına müte‘allıka da‘vâdan merkūm Yorgi’nin zimmetini ibrâ ve iskāt etmiş idi deyü def‘le mukābele ettikde gıbbe’l-istintâk ve akībe’l-inkâr vekîl-i mezbûrdan def‘-i mezkûruna beyyine taleb olundukda udûl-i Müslimînden Gemiciler ehl-i hibresi Ali Kapudan b. Mustafa ve Mehmed Çelebi b. Ali ve İbrahim Çelebi b. Hasan nâm kimesneler li-ecli’ş-şehâde meclis-i şer‘e hâzirûn olup istişhâd olunduklarında fi’l-vâki‘ işbu müdde‘î-i mezbûr el-Hâc Mustafa sefîne-i merkūmeyi bundan akdem merkūm Yorgi v. Minol’dan vekîlim yedinde gasben ahz ve istihlâk etmişdin deyü da‘vâ ve da‘vâ-i mezkûresinden merkūm Yorgi ile iki yüz guruş bedel-i makbûza sulh olup sefîne-i merkūmeye ve âlâtına müte‘allıka âmme-i da‘vâdan merkūm Yorgi’nin zimmetini huzûrumuzda ibrâ ve iskāt eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i [59a] şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mezbûr el-Hâc Mustafa sefîne-i merkūmeyi ber-vech-i muharrer merkūm Yorgi’den taleb ve da‘vâ ve müdde‘âsından sulh olup zimmetini ibrâ ve iskāt etdiğinden sonra sefîne-i merkūmeyi tekrâr müvekkil-i müşârün-ileyh Mustafa Efendi’den taleb ve da‘vâsı şer‘an mesmû‘a olmamağla mezbûr el-Hâc Mustafa mu‘ârazadan men‘ olunup mâ-vaka‘a bi’t-taleb ketb olundu. Fî 26 min-şehri Rebî‘i’l-evvel sene 1116. Şuhûdü’l-hâl: Ali Efendi b. Ahmed, Mustafa Efendi b. Ali Efendi, Ali Efendi b. Abdurrahman, Osman Efendi b. Abdülfettah, Hamza Beşe b. Ali, Molla Halil b. ( ), Hasan Çelebi b. Hüseyin, Ahmed Çelebi b. Hüseyin, Ahmed Çelebi b. Mustafa.