Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 271 Hüküm no: 226 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un küçük oğlu Mehmed için babası Veli’den nafaka tahsisi talebi Mahmiye-i İstanbul’da Beyceğiz mahâllesi sâkinelerinden Saliha bt. Abdullah nâm hatun mahmiye-i mezbûrede meclis-i şer‘de takrîr-i kelâm ve ta‘bîr ani’l-merâm edip işbu hâzır bi’l-meclis Veli b. Mehmed nâm kimesne zevcim olup bundan akdem beni tatlîk etmekle firâşından hâsıl ve benden mütevellid oğlum Mehmed’in nafaka ve kisve ve sâir levâzım-ı zarûriyesi için babası mezbûr üzerine kadr-ı ma‘rûf nafaka takdîr olunmak matlûbumdur dedikde, hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri dahi sagīr-i mezbûrun nafaka ve kisve ve sâir levâzım-ı zarûriyesi için babası merkūm Veli üzerine târîh-i kitâbdan yevmî beşer sağ akçe farz ve takdîr edip meblağ-ı mefrûz-ı mezkûru sagīr-i merkūmun levâzım-ı zarûriyesine sarfa ve lede’l-iktizâ istidâne ve vakt-i zaferde babası mezbûr Veli üzerine rücû‘a mezbûr Saliha’ya izin vermeğin mâ-vaka‘a bi’t-taleb ketb olundu. Fi’l-yevmi’r-râbi ve’l-ışrîn min-Rebî‘i’l-evvel li-sene sitte aşere ve mi’e ve elf. Şuhûdü’l-hâl: es-Sâbıkūn.