Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 271 Hüküm no: 228 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emrullah Çelebi’nin buğday bedelinden Harun v. Misas’da olan alacağının tahsil edilmesi Mahrûse-i Galata muzâfâtından kasaba-i Fındıklı’da sâkin Navluncu tâifesinden işbu bâ‘isü’l-kitâb Emrullah Çelebi b. Abdullah nâm kimesne mahmiye-i İstanbul’da meclis-i şer‘de Ekmekçi tâifesinden Harun v. Misas nâm zimmî muvâcehesinde üzerine da‘vâ ve takrîr-i kelâm edip bundan akdem mesfûr Harun yedimden iştirâ ve kabz eylediği altı yüz yirmi bir keyl buğdayın beher kilesi kırk altışar akçeden cem‘an zimmetinde yirmi sekiz bin beş yüz seksen dört akçe hakkımın dokuz bin dört yüz seksen akçesini merkūm Harun ahz u istîfâ edip bâkī zimmetinde on dokuz bin yüz altı akçe hakkımı hâlâ merkūm Harun’dan taleb ederim, suâl olunsun dedikde gıbbe’s-suâl merkūm Harun cevâbında fi’l-vâki‘ müdde‘î-i merkūm Emrullah Çelebi’den ber-vech-i muharrer ol mikdâr buğday iştirâ ve kabz eylediğini ikrâr ve lâkin beher keyli otuz beşer akçeye olmak üzere cem‘an yirmi bir bin yedi yüz otuz beş akçe deynim vardır deyü ziyâdeyi inkâr edicek müdde‘î-i mezbûrdan müdde‘âsına muvâfık beyyine taleb olundukda ikāmet-i beyyine için ba‘de’l-imhâl müdde‘î-i mezbûr Emrullah Çelebi’nin makbûzu olan dokuz bin dört yüz seksen akçeden mâ‘adâ merkūm Harun’un ikrârı mertebesi zimmetinde zuhûr eden on iki bin iki yüz elli beş akçeyi müdde‘î-i mezbûra edâ ve teslîme merkūm Harun zimmîye tenbîh birle mâ-vaka‘a bi’t-taleb ketb olundu. Fi’l-yevmi’r-râbi ve’l-ışrîn min-Rebî‘i’l-evvel li-sene sitte aşere ve mi’e ve elf. Şuhûdü’l-hâl: Hüseyin Efendi b. Himmet, Mehmed Efendi b. Ahmed, Veliyüddin Efendi el-kādı, el-Hâc Yusuf b. Osman.