Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 272 Hüküm no: 229 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hanım’ın tasarrufunda olan menzilin duvarlarının yeniden inşa edilmesi Bâ-imzâ-i Hazret-i veliyyü’n-ni‘am Mahmiye-i İstanbul’da Çerâğī Hamza mahâllesi sâkinelerinden Safiye Hanım bt. el-merhûm İzzetî eş-Şeyh Mehmed Efendi nâm meslûbetü’l-aklın tesviye-i umûruna kıbel-i şer‘den mansûb vasîsi olan işbu bâ‘isü’l-kitâb Kādızâde Mustafa Efendi b. Mehmed mahmiye-i mezbûrede meclis-i şer‘de takrîr-i kelâm edip vasîsi olduğum müşârün-ileyhâ Safiye Hanım’ın mahâlle-i mezbûrede vâki‘ ma‘lûmü’l-hudûd mülk menzili bi-emrillâhi te‘âlâ bi’l-külliye muhterik ve etrâfında olan duvarları hedm olunup müceddeden binâ olunmak lâzım ve mühim olmağın müşârün-ileyhâ Safiye Hanım’ın malıyla menzil-i mezbûrun etrâfında olan duvarlarını binâya kıbel-i şer‘den bana izin verilmek matlûbumdur dedikde hâkim-i muvakkı‘-ı sadr-ı kitâb bi’t-tevkī‘ihi’ş-şerîfi’l-müstetâb tûbâ lehû ve hüsnü-meâb hazretleri dahi müşârün-ileyhâ Safiye Hanım’ın malıyla menzil-i mezbûrun etrâfında olan duvarlarını binâya vasiyy-i mezbûr Mustafa Efendi’ye izin vermeğin mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-şehr-i Rebî‘ülevvel sene 1116. Şuhûdü’l-hâl: Ali Efendi b. Abdurrahman, Mustafa Efendi b. Ali Efendi, el-Hâc Ali Efendi b. Ahmed, el-Hâc Osman b. İsmail, İbrahim b. Abdülbaki, Ahmed Çelebi b. Muhzır.