Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 275 Hüküm no: 234 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofçu İsayi’nin Aslan v. Sefer aleyhindeki alacak davasında birbirlerinin zimmetlerini ibra etmeleri Vilâyet-i Anadolu’da Medîne-i Ankara ahâlîsinden Sofçu tâifesinden olup mahmiye-i İstanbul’da Pîrî Paşa Hanı’nda ticâret vechi üzere sâkin İsayi v. Sefer nâm zimmî mahmiye-i mezbûrede meclis-i şer‘de li-ebeveyn karındaşı işbu bâ‘isü’r-rakīm Aslan v. Sefer nâm zimmî muvâcehesinde bi-tav‘ihî ikrâr ve takrîr-i kelâm edip târîh-i kitâbdan bir buçuk sene mukaddem mesfûr Aslan müstakillen mülküm olan bir re’s kır aygır atımı benim izin ve rızâm yoğiken fuzûlen âhara doksan guruşa bey‘ ve kabz-ı semen ve semeni kendi masârıfıyla istihlâk eyledin deyü bey‘i mücîz olmayıp ve meblağ-ı mezbûru merkūm Aslan’dan taleb ve da‘vâya mütasaddî olduğumda ol dahi cevâbında meblağ-ı mezbûr mutâlebesinden mâ‘adâ mahrûse-i Edirne’de sekiz ay mukaddem şuhûd mahzarında yedimden otuz üç guruş ahz u kabz edip âmme-i da‘vâdan benim zimmetimi ibrâ ve iskāt eyledin deyü müdâfa‘a etmekle beynimizde münâza‘ât-ı kesîre vâkı‘a olmuş idi. El-hâletü hâzihi zikr olunan atın semenine ve târîh-i kitâba gelince beynimizde ahz u i‘tâ ve mu‘âmelât-ı şettâya müte‘allıka âmme-i da‘vâdan ben merkūm Aslan’ın zimmetini ibrâ ve iskāt, ol dahi vech-i muharrer üzere cemî‘ husûmete müte‘allıka da‘vâdan benim zimmetimi ibrâ ve iskāt eyledi dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: Ebubekir Ağa Hancı, el-Hâc Osman b. ( ), İbrahim Çavuş mübâşir, el-Hâc Yusuf b. Osman, Manos v. Aslan, Serkiz v. Akdon, Avanos v. Hezarşe, Ariton v. Dehaz, Panos v. Zaki