Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 275 Hüküm no: 233 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ali’nin, Agob ve Ariton aleyhindeki yaralama davasında anlaşma sağlanması Mahmiye-i İstanbul’da Sultân Mehmed Câmi‘-i şerîfi kurbünde eski Arasta’da sâkin Ahmed b. Ali b. Abdullah nâm kimesne tarafından husûs-ı âti’l-beyana vekîl olduğu Mehmed b. Ali ve Halil b. Ahmed nâm kimesneler şehâdetleriyle şer‘an vekâleti sâbit Mustafa Çelebi b. Ahmed nâm kimesne mahmiye-i mezbûrede meclis-i şer‘de işbu râfi‘ü’s-sifr Agob v. David ve Ariton v. Davik nâm Ermeni[ler] muvâcehesinde bi’l-vekâle ikrâr ve takrîr-i kelâm edip târîh-i kitâbdan beş gün mukaddem müvekkilim mezbûr Ahmed’in Karaman’dan gelirken mezbûrân Agob ve Ariton bargir üzerlerinde râkiben mürûrlarında müvekkilim mezbûr Ahmed dokunup düşmekle sağ ayağını taşa darb edip darb-ı mezkûr tesîrinden kara bere edip ağrıtmakla müvekkilim mezbûr Ahmed dahi mezbûrân Agob ve Ariton husûs-ı mezkûrun mûceb-i şer‘îsi[ni] taleb ve da‘vâ sadedinde iken beynlerinde muslihûn tavassut edip müvekkilim mezbûr Ahmed’i da‘vâ-i mezkûresinden mezbûrân Agob ve Ariton ile beş guruş üzerine sulh eylediklerinde ol dahi sulh-ı mezbûru kabûl ve bedel-i sulh olan meblağ-ı mezbûru merkūmân Agob ve Ariton’un zimmetlerini ibrâ-i âm ile ibrâ ve iskāt eyledi dedikde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Hüseyin Çelebi b. Ömer, Maden Beşe b. İbrahim, Mustafa b. Abdullah, Halil b. Mehmed, Hasan b. Mahmud, el-Hâc Yusuf b. Osman.