Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 276 Hüküm no: 236 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo v. Yani’nin varislerinin alacaklarını tahsil etmeleri Vilâyet-i Rumeli’nde kasaba-i Yanya’da Hisariçi mahâllesinde sâkin iken bundan akdem hâlik olan Hıristo v. Yani v. Papa Nikola nâm zimmînin verâseti vâlide[si] Keradse bt. Dimo Veledûde? nâm Nasrâniyeye ve li-ebeveyn kız karındaşı Çami nâm Nasrâniyeye ve li-evebeyn ammi Papa Zoti nâm zimmîye münhasıra ve tashîh-i meselesi altı sehmden olup sihâm-ı mezbûrenin iki sehmi Keradse’ye ve üç sehmi merkūme Çami’ye ve bir sehmi Papa Zoti’ye isâbet ve intikāl eylediği şer‘an zâhir oldukdan sonra mezbûre Keradse Nasrâniye tarafından ber-vech-i âtî vekâlet iddi‘â eden Vasili v. Papa Viko ve mezbûre Çami Nasrâniye tarafından dahi kezâlik iddi‘â-yı vekâlet eden sadrî kebîr oğlu Zedo v. Koçi nâm zimmîler mahmiye-i İstanbul’da meclis-i şer‘-i hatîrde işbu bâ‘isü’s-sifr Yano v. Yani nâm zimmî muvâcehesinde her biri üzerine da‘vâ ve takrîr-i kelâm edip hâlik-i mezbûr Hıristo’nun mezbûr Yano zimmî zimmetinde cihet-i deyn-i şer‘îden bin altı yüz guruş hakkı olup meblağ-ı mezbûru merkūm Yano’dan kable’l-ahz hâlik olmağla meblağ-ı mezbûr irs-i şer‘le mezbûretân Keratse ve Çami ile mezbûr Papa Zoti’ye isâbet ve intikāl etmekle mezbûretân Keratse ve Çami meblağ-ı mezbûrdan tashîh-i mezbûr üzere beş sehim hisselerine isâbet eden bin üç yüz otuz üç guruş ile bir sülüsü mezbûr Yano’dan taleb ve da‘vâ ve ahz u kabz ve kendülere îsâle ve husûs-ı mezbûr mütevakkıf olduğu umûrun küllîsine taraflarından bizi vekîl nasb u ta‘yîn eylediklerinde biz dahi vekâlet-i mezbûreleri her birimiz kabûl ve merâsimlerini edâya ta‘ahhüd etmekle hâlâ meblağ-ı mezbûr bin altı yüz guruşdan mezbûretân Keratse ve Çami’ye isâbet eden meblağ-ı mezbûr bin üç yüz guruş ile bir sülüsü mezbûr Yano’dan bi’l-vekâle taleb ederiz, suâl olunsun dedikde, gıbbe’s-suâl mezbûr Yano zimmî cevâbında hâlik-i mezbûr Hıristo’ya meblağ-ı mezbûr bin altı yüz guruş zimmetinde deyni ve bi’l-irsi’ş-şer‘î mezbûretân Keratse ve Çami ile merkūm Papa Zoti’yi intikāl eylediğini ikrâr lâkin müdde‘iyân-ı mezbûrânın mezbûretân Keratse ve Çami taraflarından ber-vech-i muharrer vekâletlerini inkâr edicek müdde‘iyân-ı mezbûrândan müdde‘âlarına muvâfık beyyine taleb olundukda kasaba-i mezbûrede Manastır mahâllesi ahâlîsinden hâlâ mahmiye-i mezbûrede Vâlide Hanı’nda müsâfiren sâkin İstati v. Kostantin v. Praşkova nâm zimmîler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ mezbûretân Keratse bt. Dimo Veldode ve Çami bt. Yani v. Papa Nikola meblağ-ı mezbûr bin altı yüz guruşdan irs-i şer‘le hisselerine isâbet eden [63a] bin üç yüz otuz üç guruş ve bir sülüsü mezbûr Yano zimmîden taleb ve da‘vâ ve ahz u kabza ve kendülere îsâle ve husûs mütevakkıf olduğu umûrun küllîsine taraflarından işbu mezbûrân Vasil’i ve Zo[ti] zimmîleri vekîl nasb u ta‘yîn eylediklerinde onlar dahi vekâlet-i mezbûreleri bizim huzûrumuzda kabûl ve merâsimini edâya ta‘ahhüd ve iltizâm eylediler biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de-ri‘âyeti şerâit-i şer‘iyye şehâdetleri makbûle olmağın mûcebince müdde‘iyân-ı mezbûrânın ber-vech-i muharrer vekâletlerine ba‘de’l-hükm meblağ-ı mezbûr bin altı yüz guruşdan müvekkiletân-ı mezbûretânın beş sehim hisselerine isâbet eden meblağ-ı mezbûr bin üç yüz otuz üç guruş ve bir sülüsü müdde‘iyân-ı mezbûrâna edâ ve teslîme mezbûr Yano zimmîye tenbîh olundukdan sonra mezbûrân Vasili ve Zoti zimmîler meclis-i şer‘de yine mezbûr Yano zimmî muvâcehesinde her biri ikrâr ve takrîr-i kelâm edip ânifen edâsına tenbîh olunan meblağ-ı mezbûr bin üç yüz otuz üç guruş bir sülüsü mezbûr Yano bize def‘ ü teslîm biz dahi vekâletimiz hasebiyle tamâmen ahz u kabz eyledik dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Rebî‘ülevvel sene 1116. Şuhûdü’l-hâl: İsmail Efendi kâtib, Ömer Efendi kâtib, Veli Efendi kâtib, Mustafa Efendi kâtib, Emin Mehmed Efendi kâtib, el-Hâc Yusuf muhzır.