Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 278 Hüküm no: 237 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çalık Halim Bey’in Bolu’nun Devrek kazasına bağlı ağıl ve kışlaklarla alakasının olmadığını ikrar etmesi Vilâyet-i Anadolu’da Bolu sancağında Mengen kazâsına tâbi‘ Karakısrak nâm karyeden olup hâlâ mahrûse-i Galata’ya tâbi‘ kasaba-i Kasımpaşa’da Küçük Piyalepaşa mahâllesinde sâkin olan Çalık Halil Bey b. Osman nâm kimesne mahmiye-i İstanbul’da meclis-i şer‘de işbu râfi‘ü’l-vesîka Hüseyin Efendi b. Muharrem Efendi mahzarında ikrâr ve takrîr-i kelâm edip livâ-i mezbûrda Devrek kazâsına tâbi‘ Başlar nâm karyede Akbük ve Uzunöz nâm mahâlde vâki‘ ve her biri âhara muttasıl Boğaz Ağıl ve Kerpiçli Ağıl ve Baraklı ve Teknekütlü? ve Kâfirkayası ve Seyricik ve Kızılelma ve Kılıçlanmış Ağıl ve Gökçeağaç ve Akçaviran nâm on aded koyun ağıllarını hâvî ve esâmi-i mezkûresiyle lede’l-ahâlî ma‘rûf ve meşhûr kezâlik tahdîd ve tavsîfden müstağnî olan kışlak ve arazisiyle işbu mezbûr Hüseyin Efendi’nin yedinde olan sâhib-i arz temessükü mantûkunca yirmi sekiz seneden beri müstakillen zabt ve tasarrufunda olup bu âna değin âhardan tasarrufuna müdâhale olunmamış iken zikr olunan kışlak kırk beş sene mukaddem fevt olan ceddim İbrahim’in tasarrufunda olup ondan otuz beş [sene] mukaddem fevt olan babam mezbûr Osman’a ondan bana intikāl etmişdir deyü zabt etmek zu‘muyla mezbûr Hüseyin Efendi’den beni da‘vâya tasaddî edip hattâ zikr olunan kışlağın rub‘ hissesini yine Mengen kazâsı ahâlîsinden Mehmed Efendi b. Abdülmümin Efendi nâm kādıya kasr-ı yed etmişidim, lâkin zikr olunan kışlak bâlâda tafsîl olunduğu üzere yirmi sekiz sene müstakillen ve bilâ-nizâ‘ taht-ı tasarrufunda olduğu mahâllinde merkūm Mehmed Efendi muvâcehesinde cemm-i gafîr haberleriyle sâbit ü zâhir olduğundan gayrı benim dahi ma‘lûmum olmağın zikr olunan kışlakda vechen mine’l-vücûh alâkam kalmadı dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 min-şehri Rebî‘ülevvel sene 1116. Şuhûdü’l-hâl: Mehmed Efendi b. Ahmed Efendi …?, İbrahim Efendi [b.] Ahmed Efendi, Ömer Efendi b. Abdülaziz, Ali Çelebi b. el-Hâc Hüseyin, Ahmed Efendi [b] Abdülmennan, Mehmed Çelebi b. Şaban, Hüseyin Çelebi b. Ömer.