Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 304 Hüküm no: 268 Orijinal metin no: [69b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbtî taifesinden Fatıma’nın eşi Ahmed’den muhalaa usulüyle boşanması Mahmiye-i İstanbul’da Balatkapısı kurbünde sâkine olup zâtı ba‘de’t-ta‘rîfi’ş-şer‘î Kıbtiye tâifesinden Fâtıma bt. Hüseyin nâm hatun mahmiye-i mezbûrede meclis-i şer‘-i hatîrde zevc-i muhâlı‘ı işbu bâ‘isü’l-kitâb Ahmed b. Şaban nâm Kıbtî mahzarında ikrâr-ı tam ve takrîr-i kelâm edip zevcim mezbûr Ahmed ile beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan iki bin mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ahmed ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru kabûl eyledikden sonra hukūk-ı zevciyete müte‘allıka cemî‘ da‘vâdan her birimiz âharın zimmetini ibrâ ve iskāt eyledik [70a] dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: İsmail Efendi el-kādı, Ömer Efendi el-kādı, Veli Efendi el-kādı, Ahmed b. Abdullah, İbrahim Beşe b. Abdullah, Hasan Beşe b. Abdülmennan, İbrahim Beşe b. Abdullah, el-Hâc Yusuf b. ( ).