Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 303 Hüküm no: 267 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın menzilinin yarısını eşi Emine’ye satması Mahmiye-i İstanbul’da Âşıkpaşa kurbünde el-Hâc Ferhad mahâllesinde sâkin el-Hâc Mehmed b. el-Hâc Mustafa nâm kimesne mahmiye-i mezbûrede meclis-i şer‘de zevce-i menkûhası râfi‘atü’l-vesîka Emine bt. el-Hâc Ahmed nâm hatun tarafından husûs-ı âti’l-beyanı tasdîka vekîl-i şer‘îsi olan Ahmed Çelebi b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup mahâlle-i mezbûrede vâki‘ bir tarafdan İbrahim Ağa veresesi mülkleri ve bir tarafdan Mustafa Ağa mülkü ve iki tarafdan tarîk-i âm ile mahdûd hâriciyesinde bir bâb fevkānî oda ve bir sofa ve bir kenîf ve dâhiliyesinde iki bâb fevkānî oda ve iki tahtânî bir bâb oda ve bir matbâh ve yanında bir oda ve bir su kuyusu ve bir kenîf ve eşcâr-ı müsmire ve gayr-ı müsmireli bahçe ve bir kârgîr mahzenimi müştemil mülk menzilimin sokak kapısı tarafından nısf-ı şâyi‘ini zevcem müvekkile-i mezbûre Emine’ye tarafeynden îcâb ve kabûlü hâvî bey‘-i kat‘î ile üç yüz guruşa bey‘ ü temlîk ve teslîm ol dahi iştirâ ve temellük ve tesellüm ve kabûl eyledikden sonra semeni olan meblağ-ı mezbûru yedinden tamâmen ahz u kabz eyledim ba‘de’l-yevm menzil-i mahdûd-ı mezkûrun sokak kapısı tarafında olan nısf-ı şâyi‘i zevcem müvekkile-i mezbûre Emine’nin mülk-i müşterâsı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Ali Efendi b. Mustafa, Veli Bey b. Ali, es-Seyyid Tahir Efendi el-imâm, Ahmed Çelebi haffâf, es-Seyyid Tayyib Mehmed Efendi b. ( ), Ekmekçi Ahmed Çelebi b. ( ), Keçeci Ahmed Çelebi b. ( ), Ebubekir Çelebi b. ( ), Mehmed Said Çelebi b. ( ).