Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 320 Hüküm no: 290 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Efendi’nin Rayko ve kardeşi Anaştaş’a müdahale ve muaraza etmemek üzere taahhütte bulunması Vilâyet-i Rumeli’nde Nigbolu kasabasında Söğütlü mahâllesi sâkinlerinden İsmail Efendi b. Mehmed nâm kimesne mahmiye-i İstanbul’da meclis-i şer‘de mahâlle-i mezbûre ahâlîsinden iken bundan akdem hâlik olan Mitre v. Yani nâm zimmînin sulbî kebîr oğulları ve hasran vârisleri olan râfi‘ayi’s-sifr Rayko ve Anaştaş nâm zimmîler muvâcehelerinde ikrâr ve takrîr-i kelâm edip mezbûr Rayko ve Anaştaş’ın babaları hâlik-i mezbûrun terekesinden olup mahâlle-i mezbûrede vâki‘ ma‘lûmü’l-hudûd menzilini bundan akdem merkūmân Rayko ve Anaştaş babamız hâlik-i merkūm zimmetinde hakkım vardır deyü fuzûlen Yorgi nâm zimmîye bey‘ ve kabz-ı semen etmiş idin deyü menzil-i mezbûru benden da‘vâ sadedinde olup lâkin da‘vâları meşrû‘a olmadığından mâ‘adâ menzil-i mezbûru bey‘de dahi sun‘um olmayıp ve babaları hâlik-i mezbûr zimmetinde bir akçe hakkım olmayıp ve menzil-i mezkûrda kat‘â alâka ve medhalim yokdur. Min-ba‘d husûs-ı mezkûra müte‘allıka mezbûrân Rayko ve Anaştaş’a müdâhale ve mu‘âraza etmemek üzere ta‘ahhüd eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 12 min-şehri Rebî‘ülâhir sene 1116. Şuhûdü’l-hâl: Hüseyin Efendi b. Himmet , İsmail Efendi el-kâtib, Ömer Efendi el-kâtib, Veli Efendi el-kâtib.