Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 320 Hüküm no: 289 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şiranizade Halil Efendi’nin Macar asıllı kölesi Ali’yi azat etmesi Mahmiye-i İstanbul’da Tevkī‘î Cafer Çelebi mahâllesi ahâlîsinden olup sâbıkā Siroz kādısı olan fahrü’l-kuzât Şiranizâde Halil Efendi b. Mehmed Efendi tarafından husûs-ı âti’l-beyana vekîl olduğu Mustafa Çelebi b. Ahmed ve Ahmed Çelebi b. Mehmed nâm kimesneler şehâdetleriyle şer‘an sâbit olan kuzât-ı Mısriye’den oğlu Abdülmuhsin Efendi mahmiye-i mezbûrede meclis-i şer‘de müvekkil-i mezbûra rikkını mu‘terif olan uzun boylu kara bıyıklı elâ gözlü Macariyyü’l-asl Müslimetü’l-mille işbu bâ‘isü’l-vesîka Ali b. Abdullah mahzarında bi’l-vekâle ikrâr ve takrîr-i kelâm edip müvekkil-i mûmâ-ileyh Şiranizâde Halil Efendi kendüye rıkkını mu‘terif olan mevsûf-ı mezbûr Ali’yi hasbeten lillâhi’l-meliki’l-Hallâk ve taleben li-merzâti’r-Rabbi’r-Rezzâk cemî‘ malından tahrîr ve i‘tâk edip sâir ahrâr-ı asliyyîn silkine idrâc ve ilhâk eyledi ba‘de’l-yevm mevsûf-ı mezbûr Ali sâir ahrâr-ı asliyyîn gibi hür olup müvekkil-i mûmâ-ileyhin velâ-i şer‘îden gayrı mezbûr Ali üzerinde hak ve alâkası kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Es-Seyyid Abdülaziz Efendi el-imâm, Mustafa Efendi el-imâm, Abdullah Çelebi el-kâtib, Abdullah Efendi el-kâtib.