Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 321 Hüküm no: 292 Orijinal metin no: [74b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocaoğlu Mehmed’in Mustafa Odabaşı’yı vasi tayin etmesi Mahmiye-i İstanbul’da Karabaş mahâllesinde sâkin Hocaoğlu demekle meşhûr el-Hâc Mehmed b. el-Hâc Muharrem b. Murad tarafından husûs-ı âti’l-beyana vekîl olduğu el-Hâc Mehmed b. el-Hâc Ahmed ve Mehmed Efendi b. Ramazan nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan es-Seyyid Mehmed Efendi b. es-Seyyid Hasan Efendi nâm kimesne mahmiye-i mezbûrede meclis-i şer‘de müvekkil-i mezbûrun ber-vech-i âtî vesâyâsını tenfîze vasiyy-i muhtârı olan işbu bâ‘isü’l-kitâb Mustafa Odabaşı b. Habib Efendi mahzarında bi’l-vekâle ikrâr ve takrîr-i kelâm [edip] müvekkil-i mezbûr el-Hâc Mehmed hasta ve sâhib-i firâş olmağla bi-emrillâhi te‘âlâ ifâkat bulmayıp vefât edersem menzilimde mevcûd ancak nakid akçem olan yüz yirmi guruş ve zimem-i nâsda olan malımdan dahi dört yüz seksen guruş ki cem‘an altı yüz guruş nukūd malım olmağla vefât eylediğimde meblağ-ı mecmû‘-ı mezbûr altı yüz guruşun sülüsü olan iki yüz guruşu mezbûr Mustafa Odabaşı ahz u kabz edip sülüs-i mezbûr iki yüz guruşdan seksen guruşunu hîn-i fevtimde sünnet-i seniyye üzere techîz ve tekfînime harc u sarf edip ve yüz yirmi guruş ile dahi vasiyy-i mezbûrun re’y ve mahâlle ahâlîsinin ma‘rifetiyle vücûh-ı hayra sarf ve dilerse kifâyet mikdârı mushaf-ı şerîf iştirâ edip [75a] müstahakkına verile deyü vasiyet ve tenfîzine mezbûr Mustafa Odabaşı’yı vasiyy-i muhtâr nasb ve ihtiyâr eyledi dedikde, ol dahi vesâyet-i mezbûreyi kabûl ve merâsimini edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşere min-şehri Rebî‘i’l-âhir li-sene sitte aşere ve mi’e ba‘de’l-elf. Şuhûdü’l-hâl: el-Hâc Mehmed b. Yusuf, Mehmed Beşe b. Hasan, İmam Ahmed Efendi b. Ramazan, Müezzin Mehmed Efendi b. Şaban, el-Hâc Mehmed b. Ahmed, Haydar Ağa b. Ahmed, Mehmed b. Hüseyin, Haydar Ağa b. Ahmed