Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 322 Hüküm no: 293 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocaoğlu Mehmed’in eşi ile birlikte oturduğu evde bulunan eşyalar ile Rus asıllı cariyesinin eşi Ümmühani’ye ait olduğunu ikrar etmesi Mahmiye-i İstanbul’da Karabaş mahâllesinde sâkin Hocaoğlu Demekle ma‘rûf el-Hâc Mehmed b. el-Hâc Muharrem b. Murad tarafından husûs-ı âti’l-beyana vekîl olduğu el-Hâc Mehmed b. el-Hâc Ahmed ve Mehmed Efendi b. Ramazan nâm kimesneler şehâdetleri ile sâbit olan işbu es-Seyyid Mehmed Efendi b. es-Seyyid Hasan nâm kimesne mahmiye-i mezbûrede meclis-i şer‘de zâtı ta‘rîf-i şer‘î ile mu‘ârefe olan müvekkil-i mezbûrun zevcesi işbu bâ‘isü’l-kitâb Ümmühani bt. Handan nâm hatun mahzarında bi’l-vekâle ikrâr ve takrîr-i kelâm edip müvekkil-i mezbûr el-Hâc Mehmed zevcesi mezbûre Ümmühani ile ber-vech-i iştirâk mahâlle-i mezbûrede vâki‘ sâkin olduğumuz menzil içinde mevcûd ve nakid malımdan ve zimem-i nâsda olan malımdan mâ‘adâ menzil-i mezbûr dâhilinde olan cemî‘ esâs-ı beyt ve evân-ı nühâsiye ve gayr-ı nühâsiyede ve orta boylu açık kaşlı gök elâ gözlü sarışın Rusiyyetü’l-asl Müslimetü’l-mille Fethi bt. Abdullah nâm bikr câriyede kat‘â alâka ve medhalim olmayıp ancak üzerimde lâbis olduğum köhne libâsımdan mâ‘adâ cümlesi zevce-i mezbûre Ümmühani’nin mülkü ve malı ve hakkıdır benim kat‘â alâka ve medhalim yokdur deyü nefy-i mülk eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 15 min-şehri Rebî‘ülâhir sene 1116. Şuhûdü’l-hâl: Es-sâbıkūn.