Bab Mahkemesi 54 Numaralı Sicil (H. 1102 / M. 1691) cilt: 20, sayfa: 363 Hüküm no: 443 Orijinal metin no: [76b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in Abdülbâki b. Mehmed’e bey‘ bi’l-istiğlâl yoluyla olan borcunun terekesinden ödenmesi Mahmiye-i İstanbul’da Manisalı mahallesinde sâkin Abdülbâki b. el-merhûm Mehmed Efendi nâm sagīrin vâlidesi ve vasiyy-i mansûbesi olan Muammer bt. Abdullah nâm hâtun meclis-i şer‘-i şerîfde, mahmiye-i mezbûrede Harâccı Muhyiddin mahallesinde sâkine iken fevt olan Fâtıma bt. Mehmed nâm hâtunun sadrî kebîr oğlu olup kendi tarafından asıl ve kebîre kızları Ümmügülsüm ve Havva taraflarından husûs-ı âti’l-beyâna vekîl-i şer‘îleri olan es-Seyyid Abdullah Çelebi b. es-Seyyid İbrahim mahzarında üzerine da‘vâ ve takrîr-i kelâm edip, yedimde olan işbu istiğlâl hücceti mûcebince müteveffât-ı mezbûre Fâtıma Hâtun hayâtında yedimde oğlum sagīr-i mezbûr mâlından istidâne ve kabz eylediği yüz elli guruş mukābelesinde mârru’z-zikr Harâccı Muhyiddin mahallesinde vâki‘ bir tarafdan Mehmed Bey ve bir tarafdan [77a] Meryem Hâtun ve bir tarafdan el-Hâc Bayram mülkleri ve bir tarafdan tarîk-i âmla mahdûd bir fevkānî oda ve tahta-bend ve havluyu müştemil mülk menzilini, bi tarîki’l-istiğlâl bana bi cümleti’t-tevâbi‘ bey‘ ve teslîm ettiğinden sonra kable’l-edâ’i’d-deyn ve zâlike’r-rehn mezbûre Fâtıma fevt olup, hasran vârisleri olan merkūmûn es-Seyyid Abdullah Çelebi ve Ümmügülsüm ve Havva terekesine vaz‘-ı yed etmeğin, hâlâ mezbûra suâl olunup, terekesinden edâ-yı deyn ve fekk-i rehin etmek üzre tenbîh olunmak matlûbumdur dedikde, gıbbe’s-suâl mezbûr es-Seyyid Abdullah Çelebi cevâbında kaziyye vech-i meşrûh üzre olup vâlidesi müteveffâ-yı mezbûre hayâtında meblağ-ı mezbûr yüz elli guruşu müdde‘iye-i mezbûreden istidâne ve kabz ve menzil-i mezbûreyi rehin ve kable’l-edâ ve’l-fek fevt olup, zimmetinde deyni kaldığını ikrâ[r] ve i‘tirâf ettiğinden mâ‘adâ terekesi dahi kabz ve vaz‘-ı yed eylediklerin i‘tirâf etmeğin, mûcebince terekesinden deyn-i mezkûru edâ ve teslîme ve fekk-i rehne mezbûr es-Seyyid Abdullah Çelebi’ye ba‘de’t-tenbîh, mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire sene 1102. Şuhûdü’l-hâl: Es-Seyyid Mehmed Çavuş b. ( ) el-mübâşir, İbrahim Çelebi b. Ahmed, Abdurrahman [b.] Hüseyin, Mustafa b. Şaban.