Bab Mahkemesi 54 Numaralı Sicil (H. 1102 / M. 1691) cilt: 20, sayfa: 364 Hüküm no: 444 Orijinal metin no: [77a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aklî Mehmed Efendi b. Ali’nin varislerinin Hasan Ağa b. İbrahim’i vekil tayin etmeleri Medîne-i Sofya’da bundan akdem maktûlen fevt olan Aklî Mehmed Efendi b. Ali nâm kimesnenin verâseti, zevce-i metrûkesi Şerîfe Fâtıma Hâtun bt. es-Seyyid Abdurrahman b. Ali ile sulbî sagīr oğulları es-Seyyid Abdurrahman ve es-Seyyid Abdüllatîf ve kebîr oğlu Abdülbâki’ye ve sagīre kızı Şerîfe Halime’ye münhasıra olduğu şer‘an zâhir ve müte‘ayyin oldukdan sonra mezbûr Abdülbâki asâleten ve sıgār-ı mezbûrûnun tesviye-i emirlerine kıbel-i şer‘den mansûb vasîleri ve merkūme Şerîfe Fâtıma Hâtun tarafından vekîl ve inde’l-hâce âharı tevkîle me’zûn olduğu yedimde olan mazmûnu müsbit hüccet-i şer‘iyye nâtıka olduğu üzre şer‘an sâbit olan es-Seyyid Ali Çelebi b. es-Seyyid Abdurrahman b. Ali vesâyeten ve vekâleten meclis-i şer‘-i şerîfde râfi‘ü hâze’l-kitâb Hasan Ağa b. İbrahim mahzarında her biri asâleten ve vesâyeten ve vekâleten ikrâr ve takrîr-i kelâm edip, müteveffâ-yı mezbûrun vilâyet-i Rumeli’nde İştip kasabasına tâbi‘ Dinler? nâm karyede vâki‘ lede’l-ahâlî ve’l-cîrân ma‘lûmü’l-hudûd bir kıt‘a çiftliğini ve yine kazâ-i mezbûra tâbi‘ Keşne? nâm karyede vâki‘ kezâlik ma‘lûmü’l-hudûd bir kıt‘a çiftliğini zabt ve hâsıl olan mahsûlâtını zabtına ve müteveffâ-yı mezbûrun kazâ-i merkūmda sâlimeten zimem-i nâsda olan hukūkunu erbâbından taleb ve da‘vâ ve ahz u kabza her birimiz tarafımızdan mezbûr Hasan Ağa’yı asâleten ve vesâyeten ve vekâleten vekîl nasb ve ta‘yîn eyledik dediklerinde, ol dahi vekâlet-i mezbûreyi kabûl ve merâsimini edâya ta‘ahhüd etmeğin, mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cumâdelâhire sene 1102. Şuhûdü’l-hâl: İsmail Bey b. Mehmed Paşa, Pîrî Çavuş b. Ali, el-Hâc İbrahim b. Ahmed, İbrahim Çelebi b. Ahmed.