Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 347 Hüküm no: 326 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun’un eşi Osman Beşe’den muhalaa usulüyle boşanması Medîne-i Ebâ Eyyûb Ensârî -aleyhi rahmetü’l-bârî- mahâllâtından Otakçılar mahâllesi sâkinelerinden olup zâtı ba‘de’t-ta‘rîfi’ş-şer‘î Rabia bt. Hüseyin nâm Hatun mahmiye-i İstanbul’da meclis-i şer‘de zevc-i muhâlı‘ı işbu bâ‘isü’l-vesîka Osman Beşe b. Ahmed nâm kimesne mahzarında ikrâr ve takrîr-i kelâm edip zevcem mezbûr Osman Beşe ile beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan bin beş yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere mezbûr Osman Beşe ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyete ve zevciyet beynimizde kāime iken mezbûr ile cemî‘ ahz u i‘tâ ve mu‘âmelât-ı şettâya müte‘allıka da‘vâdan her birimiz âharın zimmetini ibrâ ve iskāt eyledik dedikde, gıbbe’t-tasdîki’ş-şer‘î mâ-hüve’l-vâki bi’t-taleb ketb olundu. Fi’l-yevmi’l-hâdi min-Cumâdelûlâ li-sene sitte aşere ve mi’e ve elf. Şuhûdü’l-hâl: Hüseyin Efendi kâtib, Ömer Efendi kâtib, Veli Efendi kādı, Mehmed Efendi kâtib, el-Hâc Yusuf b. Osman.