Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 346 Hüküm no: 325 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un boşandığı eşi Takyeci Mustafa’dan olan oğlu Ali için nafaka talebi Mahmiye-i İstanbul’da Hoca Hayreddin mahâllesinde sâkine işbu râfi‘atü’l-vesîka Âişe bt. İbrahim nâm hatun zâtı ba‘de’t-ta‘rîfi’ş-şer‘î mahmiye-i mezbûrede meclis-i şer‘-i hatîrde zevc-i mutallıkı Takyeci Mustafa b. Abdülkadir mahzarında takrîr-i kelâm edip mezbûr Mustafa zevcim olup beni bâyinen tatlîk etmekle firâşından hâsıl ve benden mütevellid olup bi-hakkı’l-hıdâne hacr ve terbiyemde olan işbu Ali nâm sagīre nafaka ve kisve-baha ve sâir havâyic-i asliyesi için babası merkūm Mustafa üzerine kıbel-i şer‘den kadr-ı ma‘rûf nafaka farz ve takdîr olunmak matlûbumdur dedikde hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri dahi sagīr-i mezbûr Ali’ye nafaka ve kisve-baha ve sâir levâzım-ı zarûriyesi için babası merkūm Mustafa üzerine târîh-i kitâbdan yevmî beşer akçe farz ve takdîr edip meblağ-ı mefrûz-ı mezbûru sagīr-i mezbûra harc u sarfa ve vakt-i zarûretde istidâne ve lede’z-zafer babası mezbûr üzerine rücû‘a mezbûre Âişe Hatun’a izin vermeğin mâ-vaka‘a bi’t-taleb ketb olundu. Fî-gurreti Cumâdelûlâ sene sitte aşere ve mi’e ve elf. Şuhûdü’l-hâl: Mustafa Çelebi b. Süleyman, Mehmed Çelebi b. Abdullah, Mahmud Beşe b. Hasan, Mehmed Çelebi b. Rasul, Çukadâr el-Hâc Ali, Sarrâc Mehmed Beşe.