Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 348 Hüküm no: 328 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Mustafa’nın Çüngüş nahiyesindeki tarlalarını Haçok v. Avak’a satması Vilâyet-i Anadolu’da medîne-i Diyabekir kazâsı nevâhîsinden Çüngüş nâhiyesine tâbi‘ Yukarı Ardıç nâm karyeden el-Hâc İsmail b. Mustafa nâm kimesne mahmiye-i İstanbul’da meclis-i şer‘-i hatîrde yine nâhiye-i mezbûreye tâbi‘ Aşağı Ardıç nâm karyeden bâ‘isü’s-sifr Haçok v. Avak nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde ve tasarrufumda olup zikr olunan Aşağı Ardıç nâm karye hudûdu dâhilinde dere içinde vâki‘ bir tarafdan mezbûr Haçok tarlası ve bir tarafdan bayır ve bir tarafdan dere ve bir tarafdan çeşme harkı ile mahdûd câ-be-câ eşcâr-ı müsmire ve gayr-ı müsmireli bir kıt‘a ve yine karye-i mezbûre hudûdu dâhilinde Kızıltoprak nâm mevzi‘de vâki‘ etrâf-ı erba‘ası Zarifoğlu ve Taruganoğlu Bogos nâm zimmîler ile Hanbedi nâm Nasrâniye tarlaları, hark ile mahdûd kezâlik bir kıt‘a ki mârrü’z-zikr iki kıt‘a tarlalarımı hüsn-i rızâ ve ihtiyârım ve ferâğ-ı kat‘î ve ma‘rifet-i sâhib-i arz ile yirmi guruş kıymetli bir re’s iğdiç kır bargir ile dört guruşa mesfûr Haçok’a ferâğ ve tefvîz ve mahâllerinde zabt ve tasarrufa taslît edip ol dahi ber-vech-i muharrer tefevvüz ve kabûl eyledikden sonra bedel-i ferâğ olmak üzere sâlifü’z-zikr bargir ile meblağ-ı merkūm dört guruşu merkūm Haçok yedinden tamâmen ahz u kabz eyledim, fîmâ-ba‘d mârrü’l-beyan tarlalarda benim alâka ve medhalim kalmayıp mesfûr Haçok’un dâhil-i havza-i tasarrufu olmuşdur, mahâllerinde dilediği gibi mutasarrıf olsun dedikde, gıbbe’t-tasdîki’l-mu‘tebere mâ-hüve’l-vâki‘ bi’t-taleb ketb olundu. Fî-gurreti Cumâdelûlâ sene sitte aşere ve mi’e ve elf. Şuhûdü’l-hâl: Mustafa Beşe b. Musa, İsmail b. Mehmed, Mustafa b. İsmail, Şükrü b. İsmail, İbrahim Beşe anbarcı, Mehmed Efendi b. Ahmed, el-Hâc Yusuf b. Osman