Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 348 Hüküm no: 329 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’un boşandığı eşi Hüseyin Çelebi’de mehir ve sair eşyalardan dolayı olan alacağını tahsil etmesi Mahmiye-i İstanbul’da Kâtibmuslihiddin mahâllesinde sâkine Emetullah bt. Abdullah nâm Hatun’un ammi ve tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân İbrahim Çelebi b. Ahmed ve Mustafa Beşe b. Ali nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan Mustafa Çelebi b. Ahmed nâm kimesne mahmiye-i mezbûre meclis-i şer‘-i hatîrde müvekkile-i mezbûrenin zevc-i mutallıkı işbu râfi‘ü’l-vesîka Hüseyin Çelebi b. İsmail nâm kimesne mahzarında bi’l-vekâle ikrâr ve takrîr-i kelâm edip târîh-i kitâbdan dört gün mukaddem mezbûr Hüseyin Çelebi zevcesi müvekkilem mezbûre Emetullah’ı bâyinen tatlîk etmekle zimmetinde mütekarrir ve ma‘kūdün-aleyh mehr-i mu‘acceli olan bir beledî döşek ve iki beledî yorgan ve bir tencere ve bir minder ve iki sahan ve bir leğen ve bir ibrik ve iki beledî yasdık ve bin akçe mehr-i müeccelini ve nafaka-i iddet-i ma‘lûme ve meûnet-i süknâsı için dahi bi’t-terâzî ta‘yîn olunan üç yüz akçeyi mezbûr Hüseyin Çelebi müvekkilem mezbûreye tamâmen def‘ ü teslîm ol dahi yedinden ahz u kabz edip hukūk-ı zevciyete ve sâire müte‘allıka âmme-i de‘âvî ve kâffe-i mutâlebâtdan her biri âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Rebî‘i’l-âhir li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi, Ömer Efendi, Veli Efendi, Emin Mehmed Efendi, el-Hâc Yusuf, el-Hâc Ali b. Ebubekir, Abdullah Çelebi b. Ahmed, Seyyid Musa Çelebi b. Mahmud, Hasan Çelebi b. Veli, Abdülbaki Beşe b. Abdülkerim ve gayruhum mine’l-huzzâr.