Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 358 Hüküm no: 340 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un eşi Mustafa Beşe’den muhalaa yoluyla boşanması Mahmiye-i İstanbul’da Kadıçeşmesi kurbünde Altıpoğaça mahâllesi sâkinelerinden olup zâtı Sinan Efendi b. Ali ve Kadri Çelebi b. Mehmed nâm kimesneler ta‘rîfleriyle mu‘arrefe olan Âişe bt. Hasan nâm hatun mahmiye-i mezbûrede meclis-i şer‘-i hatîr-i lâzımü’t-tevkīrde zevc-i muhâlı‘ı işbu bâ‘isü’l-vesîka Mustafa Beşe b. Mehmed nâm kimesne mahzarında ikrâr ve takrîr-i kelâm edip zevcim mezbûr Mustafa Beşe ile beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan yirmi beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa Beşe ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyete müte‘allıka da‘vâdan her birimiz âharın zimmetini ibrâ ve iskāt eyledik dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Cumâdelûlâ sene sitte ve aşere ve mi’e ve elf. Şuhûdü’l-hâl: Hüseyin Efendi el-imâm, Molla Ali b. Fethullah, Kadri Çelebi b. Mehmed, İbrahim b. Hüseyin, el-Hâc Yusuf b. Osman, Ahmed Çelebi b. Mehmed, Receb Bey b. Ali, Ahmed Çelebi b. Mehmed.