Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 357 Hüküm no: 339 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hasan’ın yanında bulunan küçük kızı Emine’ye nafaka takdiri Mahmiye-i İstanbul’da Kadıçeşmesi kurbünde Altıpoğaça mahâllesi sâkinelerinden Âişe bt. Hasan nâm Hatun mahmiye-i mezbûrede meclis-i şer‘-i hatîrde zevc-i sâbıkı Mustafa Beşe b. Mehmed nâm kimesne mahzarında takrîr-i kelâm edip mezbûr Mustafa Beşe’nin firâşından hâsıla ve benden mütevellide işbu sagīre kızım Emine’nin nafaka ve kisve ve sâir levâzım-ı zarûriyesi için babası mezbûr Mustafa Beşe üzerine kadr-ı ma‘rûf nafaka ve kisve-baha farz ve takdîr olunmak matlûbumdur dedikde hâkim-i muvakkı‘-ı sadr-ı kitâb hazretleri dahi sagīr-i mezbûrun nafaka ve kisve-baha ve sâir levâzım-ı zarûriyesi için babası mezbûr Mustafa üzerine târîh-i kitâbdan yevmî dörder akçe farz ve takdîr edip meblağ-ı mezbûru sagīr-i mezbûrun nafaka ve kisve-baha ve sâir levâzımına harc u sarfa ve lede’l-hâce istidâne ve vakt-i zaferde babası mezbûr üzerine rücû‘a izin vermeğin mâ-vaka‘a bi’t-taleb ketb olundu. Fî 4 min-Cumâdelûlâ sene 1116 Şuhûdü’l-hâl: Hüseyin Efendi imam, Sinan Efendi b. Ali, Molla Ali b. Mehmed, Kadri Çelebi b. Mehmed, Ahmed Efendi b. Abdullah, İbrahim b. Hüseyin, el-Hâc Yusuf b. Osman.