Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 359 Hüküm no: 342 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın menzilini Ali Çelebi’ye satması Mahmiye-i İstanbul’da Gül Câmi‘i mahâllesinde sâkin Ali Ağa b. el-Hâc Hasan nâm kimesne mahmiye-i mezbûrede meclis-i şer‘-i enverde işbu râfi‘ü’l-kitâb Ali Çelebi b. el-Hâc Selim nâm kimesne mahzarında ikrâr ve takrîr-i kelâm edip akd-i âti’l-beyanın sudûruna değin yedimde mülküm olup mahâlle-i mezbûrede vâki‘ bir tarafdan Hasırcı el-Hâc Selim veresesi mülkleri ve bir tarafdan Araboğlu Mehmed Beşe menzili ve iki tarafdan tarîk-i âm ile mahdûd dâhiliyesi fevkānî bir bâb oda ve bir sofa ve kenîf ve vüstâsında bir bâb oda ve tahtında bir matbâh ve kilâr ve su kuyusu ve havluyu ve hâriciyesinde fevkānî bir bâb oda ve bir sofa ve vüstâsında bir bâb oda ve bir sofa ve sokak tarafında tahtadan mebnâ bir oda ve bir ahır ve havluyu müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Ali Çelebi’ye sekiz yüz yetmiş beş guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr sekiz yüz yetmiş beş guruşu mezbûr Ali Çelebi yedinden tamâmen ahz u kabz eyledim, ba‘de’l-yevm menzil-i mahdûd-ı mezkûrda kat‘â alâka ve medhalim kalmadı, mezbûr Ali Çelebi’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 min-Cumâdelûlâ sene 1116 Şuhûdü’l-hâl: Hüseyin Efendi el-kādı, Ömer Efendi kâtib, el-Hâc Ahmed b. Mansur, Mansur b. Yusuf, el-Hâc Süleyman b. Selim, Şaban b. Yusuf, Ali Çelebi b. Receb, Mehmed Çelebi b. el-Hâc Halil, el-Hâc Ahmed b. Ramazan, Mehmed b. Veli, İmam Mehmed Efendi.