Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 359 Hüküm no: 343 Orijinal metin no: [84b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’un menzilini satması Mahmiye-i İstanbul’da Keçeci Pîrî mahâllesinde sâkine Emetullah bt. Musa Efendi nâm hatun tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân el-Hâc Hasan b. Derviş ve diğer Hasan b. Abdullah nâm kimesneler şehâdetleriyle şer‘an vekâleti sâbite olan Saime bt. Sefer nâm hatun mahmiye-i mezbûrede meclis-i şer‘-i hatîrde işbu râfi‘atü’l-vesîka Safiye bt. Abdullah nâm hatun mahzarında vekâleten ikrâr ve takrîr-i kelâm edip akd-i âti’z-zikrin sudûruna değin müvekkile-i mezbûrenin mülk ve hakkı olup mahâlle-i mezbûrede vâki‘ bir tarafdan Halil Beşe mülkü ve bir tarafdan Mustafa Çelebi mülkü ve bir tarafdan mahâlle-i mezbûre avârızına mevkūfe menzil ve bir tarafdan tarîk-i hâs ile mahdûd fevkānî ve tahtânî üç bâb oda ve matbâh ve kenîf ve havluyu müştemil mülk menzilini bi-cümleti’t-tevâbi‘ ve’l-levâhık tarafeynden bi’l-îcâb ve’l-kabûl bey‘-i kat‘î ile mezbûre Safiye Hatun’a yüz otuz guruşa bey‘ ve temlîk ve teslîm, ol dahi ber-vech-i muharrer iştirâ ve temellük ve kabz ve kabûl eyledikden sonra semeni olan meblağ-ı mezbûr yüz otuz guruşu mezbûre Safiye Hatun müvekkile-i mezbûreye def‘ ü teslîm ol dahi tamâmen ahz u kabz eyledi, ba‘de’l-yevm menzil-i mahdûd-ı mezkûrda müvekkile-i mezbûrenin kat‘â alâka ve medhali kalmadı, mezbûre Safiye Hatun’un mülk-i müşterâsı ve hakk-ı sırfı olmuşdur, [85a] keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min-Cumâdelûlâ li-sene sitte aşere ve mi’e ve elf. Şuhûdü’l-hâl: Kahraman Efendi b. Abdurrahman, Mustafa Efendi el-kādı, İbrahim Çelebi b. Mustafa, Abdi b. Câbî Hüseyin, Mehmed Beşe b. Ahmed, Câbî Hüseyin b. İbrahim, Câbî Mustafa b. Ömer.