Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 362 Hüküm no: 347 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mütevelli Abdülbaki Beşe’nin vefat eden Bayezid Bey’de olan vakıf alacağını tahsil etmesi Dergâh-ı âlî -dâme mahfûfen bi’l-meâlî- yeniçeri[leri]nin yirminci cemâ‘atine mahsûs oda neferâtının nukūd-ı mevkūfesine bi’l-fi‘il mütevellî olan Abdülbaki Beşe b. Mustafa nâm kimesne mahmiye-i İstanbul’da meclis-i şer‘de mahmiye-i mezbûrede Mimarsinan mahâllesinde sâkin iken bundan akdem fevt olan Bâyezid Bey b. Kenan Paşa’nın sulbî kebîr oğlu işbu râfi‘ü’l-vesîka Mehmed Bey mahzarında bi’t-tevliye ikrâr ve takrîr-i kelâm edip müteveffâ-yı mezbûr Bâyezid Bey’in yedinde mülkü olup mahâlle-i mezbûrede vâki‘ ma‘lûmü’l-hudûd ve’l-müştemilât ebniyesi mülk menzilini hayâtında bin yüz üç senesinde taraf-ı vakıfda ber-vech-i muharrer bi-tarîkı’l-istiğlâl beş yüz guruşa bey‘ ve teslîm ve semeni olan meblağ-ı mezbûru mâl-ı vakf-ı mezbûrdan ahz u kabz eylediğimden sonra menzil-i mahdûd-ı mezbûr taraf-ı vakıfda ber-vech-i muharrer istiğlâl iken yüz beş senesinde vâki‘ harîkde bi-emrillâhi te‘âlâ bi’l-külliye muhterik olup ancak arsa-i sırfe kalmağla lâkin menzil-i mezkûr hakīkatde rehin olup ve kıymeti ancak dört yüz guruş olmağın müteveffâ-yı mezbûrun beş yüz guruş taraf-ı vakfa olan deyninden dört yüz guruşu bi-hasebi’ş-şer‘ sâkıt oldukdan sonra müteveffâ-yı mezbûr fevt olup taraf-ı vakfa yüz guruş deyni bâkī kalmağla hâlâ meblağ-ı bâkī-i mezbûru dahi merkūm Mehmed Bey bana bi’t-tevliye def‘ ü teslîm, ben dahi yedinden ahz u kabz edip meblağ-ı mezbûrdan müteveffâ-yı mezbûr zimmetinde bir akçe kalmayıp ve arsa-i menzil-i mezkûrda dahi kimesnenin alâkası yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min-Cumâdelûlâ sene sitte aşere ve mi’e ve elf. Şuhûdü’l-hâl: el-Hâc Mustafa b. Abdullah, Osman Beşe b. Ali, Hamza Efendi b. Mehmed, Mustafa b. Hüseyin, İbrahim b. Abdullah, Murtaza Ağa b. Osman, Mehmed b. Ahmed.