Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 361 Hüküm no: 346 Orijinal metin no: [85a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed ve Hasan isimli kardeşlerin Ali Ağa aleyhindeki miras davasında sulh olmaları Mahrûse-i Galata’ya tâbi‘ kasaba-i Kasımpaşa’da Sirkeci Muslihiddin mahâllesinde sâkine iken bundan akdem vefât eden Emine bt. Hüseyin [nâm] hatunun verâseti zevc-i metrûku Ali Ağa b. Abdurrahman ve li-ebeveyn kız karındaşı Âişe nâm hatuna münhasıra olup ba‘dehâ mezbûre Âişe dahi vefât edip verâseti sadrî kebîr oğulları Mehmed ve Hasan ibney Ali nâm kimesnelere münhasıra olduğu zâhir ve müte‘ayyin oldukdan sonra mezbûr Mehmed kendi tarafından [asil] ve karındaşı mezbûr Hasan tarafından husûs-ı [âti]’l-beyana vekîl olduğu nehc-i şer‘î ve tarîk-i mer‘î üzere sâbit olmağla vekâleten mahmiye-i mezbûrede meclis-i şer‘de müteveffât-ı mezbûre Emine’nin zevci işbu bâ‘isü’l-kitâb mezbûr Ali Ağa tarafından husûs-ı âti’l-beyana vekîl olduğu Ahmed Beşe b. Mustafa ve İvaz Bey b. Abdullah şehâdetleriyle sâbit olan Osman Çelebi b. Mehmed mahzarında ikrâr ve takrîr-i kelâm edip müteveffât-ı mezbûre Emine’nin zevci müvekkil-i mezbûr Ali Ağa zimmetinde mütekarrir ve ma‘kūdün-aleyh olan üç yüz elli guruş mehr-i müeccelini kable’l-ahz ve’l-istifâ vefât eylediğinden sonra vâlidem müteveffât-ı mezbûre Âişe meblağ-ı mezbûrdan kendüye isâbet eden meblağ-ı mezbûr yetmiş beş guruş bi’l-irsi’ş-şer‘î bize isâbet ve intikāl etmekle hâlâ meblağ-ı mezbûr yetmiş beş guruşun asâleten ve vekâleten müvekkil-i mezbûr Ali Ağa’dan taleb ve da‘vâ eylediğimizde ol dahi cevâbında zevcem müteveffât-ı mezbûre Emine’nin mehr-i müecceli ancak yirmi bin akçedir deyip ziyâdesini inkâr etmekle ben dahi ziyâde-i mezbûreyi isbât sadedinde iken beynimizde nizâ‘-ı küllî vâki‘ olmuş idi. El-hâletü hâzihi beynimize muslihûn tavassut edip da‘vâ-i mezbûremden asâleten ve vekâleten müvekkil-i mezbûr Ali Ağa ile sekiz bin akçe üzerine sulh eylediklerinde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûr sekiz bin akçeyi müvekkil-i mezbûr Ali Ağa yedinden tamâmen ahz u kabz eylediğimden sonra ben müteveffât-ı mezbûre Emine’nin mehrine ve sâir muhallefâtına müte‘allıka âmme-i da‘vâdan müvekkil-i mezbûrun zimmetini ibrâ ve iskāt edip, ol dahi husûs-ı mezbûra müte‘allıka da‘vâdan benim ile karındaşım mezbûr Hasan’ın zimmetini ibrâ ve iskāt eyledi dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 8 min-Cumâdelûlâ sene 1116 Şuhûdü’l-hâl: Mustafa Kethüda b. Ramazan, Mehmed b. Hasan, Abdi Çelebi b. Hasan, Mehmed Çavuş b. el-Mübâşir, el-Hâc Yusuf b. Osman.