Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 365 Hüküm no: 351 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo v. Yorgi’nin, İstamo v. Suse aleyhindeki alacak davasında sulh olması Mahmiye-i İstanbul’da Tevkī‘î Cafer mahâllesinde sâkin Hıristo v. Yorgi nâm zimmî mahmiye-i mezbûrede meclis-i şer‘de İstamo v. Suse nâm zimmî muvâcehesinde ikrâr ve takrîr-i kelâm edip bundan akdem mezbûr Estamo’nun kızı Salona nâm Nasrâniyeyi kendime nâmzed eylediğimde bir def‘a malımdan yirmi guruş ve bir def‘a dahi on guruş ve bir def‘a dahi bir buçuk guruş ki cem‘an otuz bir buçuk guruşumu ahz u kabz etmekle ben dahi hâlâ mezbûr İstamo’nun kızını almadan fâriğ olmağın meblağ-ı mezbûru merkūm İstamo’dan taleb ve da‘vâ eylediğimde ol dahi ba‘de’l-inkâr ben dahi sana iki guruş kıymetli ve bir guruş kıymetli bir yüzük ve bir buçuk guruş kıymetli beş makreme ve iki guruş kıymetli bir sîm yüzük ve üç guruş kıymetli sîm zincirli bir tunç David vermişdim deyü benden da‘vâ sadedinde olmağın beynimizde muslihûn tavassut edip da‘vâ-i mezkûremden beni müdde‘âsı olan eşyâ-yı mezkûreden mâ‘adâ beş guruş üzerine mezbûr İstamo ile sulh eylediklerinde ben dahi sulh-ı mezbûru kabûl ve bedel-i <> sulh olan meblağ-ı mezbûru yedinden ba‘de’l-ahz ve’l-kabz husûs-ı mezkûra müte‘allıka âmme-i da‘vâdan mezbûr İstamo’nun zimmetini ibrâ ve iskāt edip ol dahi zikr olunan eşyâ ve sâire müte‘allıka âmme-i da‘vâdan benim zimmetimi ibrâ ve iskāt eyledi dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 9 min-Cumâdelûlâ sene 1116 Şuhûdü’l-hâl: Hüseyin Efendi b. Himmet, İsmail Efendi kâtib, el-Hâc Mehmed Efendi kâtib, el-Hâc Yusuf b. Osman, Zafiri v. İslomi, diğer Zafiri v. Kano.