Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 365 Hüküm no: 352 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peşkura bt. Mercan’ın eşi Abraham’da olan alacağının tahsil edilmesi Mahmiye-i İstanbul’da Fener kapısı dâhilinde Abdi Subaşı mahâllesinde sâkine bâ‘isü’s-sifr Peşkura bt. Mercan nâm Nasrâniye mahmiye-i mezbûrede meclis-i şer‘-i hatîrde hâlâ zevci Abraham v. Norsez nâm zimmî muvâcehesinde üzerine da‘vâ ve takrîr-i kelâm edip zevcim mesfûr Abraham zimmetinde beynimizde ma‘lûm bilezik ve kaftan <> ve sâir ahz u i‘tâya müte‘allıka ba‘de-küll-i hesâb yüz elli sekiz guruş hakkım olup husûs-ı mezbûru bin yüz on dört senesi Rebî‘ülevveli’nin ikinci gününde mahmiye-i mezbûrede Bâb Mahkemesi’nde nâibü’ş-şer‘ olan Sunullah Efendi huzûrunda zevcim mezbûr Abraham’dan da‘vâ, ol dahi husûs-ı mezbûrun ba‘zısını ikrâr ve ba‘zısını inkâr edip beynimizde ba‘de’n-nizâ‘ vesâtat-ı muslihîn ile mezbûr Abraham da‘vâ-i mezkûremden benim ile doksan guruşa sulh, ben dahi sulh-ı mezbûru kabûl edip lâkin mezbûr Abraham’ın târîh-i mezkûrda bedel-i sulh-ı mezbûru âcilen edâya iktidârı olmayıp tecîle tâlib olmağla ben dahi bedel-i mezkûru her üç yüz altmış günde bana otuz guruş verip vech-i meşrûh üzere bin seksen günde meblağ-ı merkūmu edâ etmek üzere zevcim mezbûr Abraham’ı tecîl eylediğimde ol dahi kabûl ve ber-vech-i muharrer bana edâya ta‘ahhüd etmiş idi. Hâlâ târîh-i mezbûrdan târîh-i kitâbe gelince iki sene mürûr edip zimmetinde bedel-i sulh-ı mezbûrdan hakkım olup müctemi‘ olan altmış guruşu mezbûr Abraham’dan taleb ederim deyip, nâib-i mezbûrun [hat] ve hatemini hâvî ve târîh-i mezbûr ile müverrah bir kıt‘a hüccet-i şer‘iyye ibrâz edicek gıbbe’s-suâl mezbûr Abraham cevâbında fi’l-hakīka kazıyye min-külli’l-vücûh müdde‘iye-i mezbûrenin takrîr-i meşrûhu üzere olduğunu ikrâr lâkin meblağ-ı merkūm altmış guruşun elli guruşunu bundan akdem müdde‘iye-i mezbûreye edâ edip meblağ-ı merkūmdan müdde‘iye-i mezbûreye zimmetimde ancak on guruş deynim kalmışdır deyü müdde‘iye-i mezbûreyi ba‘zı müdde‘âsında def‘le mukābele edicek gıbbe’l-istintâk ve’l-inkâr mezbûr Abraham’dan def‘-i mezkûruna beyyine taleb olundukda ityân-ı beyyineden izhâr-ı aczile istihlâf etmeğin fi’l-hakīka mezbûr Abraham’dan vech-i meşrûh üzere elli guruş ahz u istîfâ etmediğine müdde‘iye-i mezbûre Peşkura’ya yemîn teklîf olundukda ol dahi yemîn billâhillezî enzele’l-İncîle alâ-İsâ -aleyhi’s-selâm- etmeğin mûcebince meblağ-ı merkūm altmış guruşu müdde‘iye-i mezbûreye edâ ve teslîme mezbûr Abraham’a ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’l-hâdi aşer min-Cumâdelûlâ li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi b. Sandalcızâde, Ömer Efendi b. Ali, el-Hâc Yusuf b. Osman.