Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 397 Hüküm no: 397 Orijinal metin no: [94a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi’nin Fatıma Hatun’da emanet olan eşya ve paralarını teslim alması Husûs-ı âti’l-beyanın mahâllinde tahrîri iltimâs olunmağın savb-ı şer‘den bi’t-taleb irsâl olunan Sandalcızâde Mevlânâ İsmail Efendi mahmiye-i İstanbul’da Molla Şeref mahâllesinde vâki‘ Hacce Fâtıma bt. el-Hâc Mehmed nâm hatunun sâkine olduğu menzile varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘ eyledikde mahâlle-i mezbûre sâkinlerinden Ömer Çelebi b. el-Hâc Ahmed nâm kimesne meclis-i ma‘kūd-ı mezkûrda işbu râfi‘atü’l-vesîka mezbûre Hacce Fâtıma Hatun mahzarında ikrâr ve takrîr-i kelâm edip mahâlle-i mezbûre ahâlîsinden olup bundan akdem Şam-ı şerîf’de fevt olan el-Hâc Yusuf b. Abdullah nâm kimesne benim babam el-Hâc Ahmed’in babası el-Hâc Mehmed b. Ali b. Abdullah’ın mu‘takı olup müteveffâ-yı mezbûr el-Hâc Yusuf’un verâseti min-ciheti’l-usûbeti’s-sebebiye ancak bana münhasıra olup benden gayrı vârisi ve terekesine müstahıkk-ı âhar kimesne olmamağla müteveffâ-yı mezbûr el-Hâc Yusuf bundan akdem Şam-ı şerîf’e gider olduğu hâlde mezbûre Hacce Fâtıma Hatun’a eşyâsından iki mukaffel sandık içinde mevcûd bir en‘âm-ı şerîf ve üç çakşır ve bir kavuk ve bir sîm kebîr bıçak ve bir beyaz kerrâke ve üç tesbîh ve iki makreme ve beş peşkûnu ve elli sekiz aded yağlık ve bir göbek misk ve bir sagīr tas [94b] ve yedi aded fağfûrî fincân ve beş aded sagīr lengeri ve üç havlu makreme ve bir alaca fetavâyi ve dört gömlek ve iki gömlek işi ve dört köhne sarık ve bir cedîd sarık iki kahve ibriği ve bir şamdân ve üç fener ve iki kavuk ve bir kırmızı çuka kesme ve bir meneviş çuka dolama ve bir kırmızı çuka dîvân dolaması ve iki zıbun ve iki çakşır ve iki şerbetî makreme ve üç sarık ve bir kırmızı mukaddem kuşak ve üç beyaz sâde ve bir cedîd sâde ve bir yeşil sipâh dolaması ve bir tas ve bir cüzdan ve bir sîm yeniçeri keçesi ve iki yasdık ve bir yorgan-ı eşrefî ve tuğrâlı ve Macar ve Engürüs altını ve cedîd akçe ve para ve eski guruş ve zolota ve bi’l-cümle mahlût dört yüz on guruşunu alâ-tarîkı’l-emâne yedine îdâ‘ ve teslîm ol dahi istîdâ‘ ve tesellüm etmekle hâlâ ben dahi ber-vech-i muharrer verâsetimi mezbûr Hacce Fâtıma Hatun’un vekîl-i şer‘îsi Mehmed Efendi b. el-Hâc Mustafa muvâcehesinde şuhûd-ı udûlden İmam İbrahim Efendi b. Hüsrev ve el-Hâc Mustafa b. İbrahim ve Müezzin Abdi Çelebi b. Mehmed ve Mahmud b. Abdullah nâm kimesneler şehâdetleriyle vech-i şer‘î üzere ba‘de’l-isbât verâsetime hükm olunup eşyâ-yı mezkûre ile meblağ-ı merkūmu ber-mûceb-i hükm-i şer‘î bi’t-tamâm bana def‘ ve teslîme tenbîh birle yedime hüccet-i şer‘iyye verilmiş idi. Hâlâ mezbûre Hacce Fâtıma Hatun eşyâ-yı mezkûre ile meblağ-ı mezbûru ber-mûceb-i hükm-i şer‘î bi’t-tamâm bana def‘ ü teslîm ben dahi yedinden ahz u kabz eylediğimden sonra eşyâ-yı mezkûre ile meblağ-ı mezbûrdan merkūme Hacce Fâtıma Hatun yedinde ve zimmetinde bir akçe ve bir habbe bâkī kalmadı, müteveffâ-yı mezbûrun terekesine müte‘allıka âmme-i da‘vâdan mezbûre Hacce Fâtıma Hatun’un zimmetini ibrâ ve iskāt eyledim dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an ba‘s olunan Sarrâc Mehmed b. Abdullah ve Ali b. Mehmed ile meclis-i şer‘e gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelûlâ sene sitte aşere ve mi’e ve elf. Şuhûdü’l-hâl: Mahmud Odabaşı b. Mehmed, Hüseyin Beşe b. Ali, Abdi Çelebi b. el-Hâc Mehmed, Ali Çelebi b. İsmail.