Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 396 Hüküm no: 396 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muslı b. Osman’ın veraseten intikal eden ev ve hayvanlardaki hissesini Mustafa b. Receb’e satması Havâss-ı refî‘a kazâsı muzâfâtından İpe? nâm karye sâkinelerinden olup bundan akdem müteveffiye olan Fâtıma bt. el-Hâc Mustafa nâm hatunun verâseti zevci Süleyman b. Ömer nâm kimesne ile li-ebeveyn ammisi oğlu Muslı b. Osman nâm kimesneye münhasıra olduğu şer‘an zâhir ve müte‘ayyin oldukdan sonra mezbûr Muslı mahmiye-i İstanbul’da meclis-i şer‘de işbu bâ‘isü’l-kitâb el-Hâc Mustafa b. Receb nâm kimesne mahzarında ikrâr ve takrîr-i kelâm [edip] müteveffiye-i mezbûrenin hayâtında mülkü olup karye-i mezbûrede vâki‘ bir tarafdan Palaş nâm zimmî mülkü ve bir tarafdan Hüseyin nâm kimesne mülkü ve iki tarafdan tarîk-i âm ile mahdûd üç bâb fevkānî oda ve iki bâb tahtânî oda ve bir ambar ve bir ahır ve bir bâb çatma ta‘bîr olunur tahtadan mebnâ oda ve bir bi’r-i mâ ve bir samanlık ve havlu ve bir mikdâr bahçeyi müştemil çiftlik ta‘bîr olunur menzilin ba‘de-vefâtihâ nısfı irs-i şer‘le bana intikāl etmekle vech-i meşrûh üzere zikr olunan menzilde olan nısf hisse-i şâyi‘amı ve hîn-i akd-i bey‘de menzil-i mezkûrun içinde mevcûd bir çift kara sığır öküzü ve bir re’s inek ve iki arabamı tarafeynden îcâb ve kabûlü hâvî bey‘-i bâtt-ı sahîh-i şer‘î ile müşterî-i merkūm el-Hâc Mustafa’ya yüz guruşa bey‘ ve temlîk ve teslîm ol dahi ber-vechi muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yüz guruşu müşterî-i merkūm bana def‘ ü teslîm ben dahi yedinden tamâmen ahz u kabz eyledim ba‘de’l-yevm menzil-i mahdûd-ı mezbûrun nısfı ve mârrü’z-zikr öküz ve inek ve arabalar müşterî-i merkūm el-Hâc Mustafa’nın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelûlâ sene sitte aşere ve mi’e ve elf. Şuhûdü’l-hâl: Abdullah Efendi imam-ı karye-i mezbûre, Halil b. Mustafa, Hüseyin Bey b. Mustafa, Mehmed Bey bölükbaşı, Mustafa Çelebi bekçi, Ali Bey b. Abdullah, Ahmed Çelebi b. Mehmed, el-Hâc Yusuf b Osman.