Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 400 Hüküm no: 401 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin, Rus asıllı kölesi Safiye’yi azat etmesi Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i şerîf-i enverden irsâl olunan Mevlânâ Ahmed Efendi b. Yusuf Halîfe mahmiye-i İstanbul’da Sinan Ağa mahâllesinde sâkin fahrü’l-müderrisîni’l-kirâm el-Hâc Abdullah Efendi’nin menziline varıp zeyl-i kitâbda muharrerü’l-esâmi Müslimîn huzûrunda akd-i meclis-i şer‘-i nebevî eyledikde mûmâ-ileyh el-Hâc Abdullah Efendi meclis-i ma‘kūd-ı mezbûrda ikrâr ve takrîr-i kelâm edip bana rıkkını mu‘terife olan işbu orta boylu açık kaşlı elâ gözlü, kertelez burunlu Rusiyyetü’l-asl sâhibetü’l-kitâb Safiye bt. Abdülmennan câriye-i memlûkemi hasbeten lillâhi te‘âlâ ve haseneten li-rûhi Rasûlillâhi’l-mu‘allâ cemî‘ malımdan tahrîr ve i‘tâk ve zümre-i harâir-i asliyâta idrâc ve ilhâk eyledim ba‘de’l-yevm mevsûfe-i mezbûre Safiye sâir harâir-i asliyât gibi hürre olup üzerinde velâ-i şer‘iyyeden gayrı alâka ve medhalim kalmadı dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan Süleyman Çelebi b. Abdullah ile meclis-i şer‘e gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu. Fî-gurreti Cemâziyelâhire sene sitte aşere ve mi’e ve elf. Şuhûdü’l-hâl: Ahmed Ağa kethüdâ-i Fenârîzâde sâbıkā, el-Hâc İbrahim Ağa b. ( ), Hamza Fazlı Efendi b. ( ). İsmail Çelebi b. Fazlı Efendi, Süleyman Çelebi b. Abdullah, el-Hâc Osman b. ( ).