Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 400 Hüküm no: 400 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avak v. Gaspar’ın, İstepan v. Dragoz aleyhindeki alacak davasının reddedilmesi Ekmekçi tâifesinden Avak v. Kasper nâm Ermeni mahmiye-i İstanbul’da meclis-i şer‘-i hatîrde işbu râfi‘ü’l-vesîka İstepan v. Dragoz nâm zimmî muvâcehesinde üzerine da‘vâ ve takrîr-i kelâm edip târîh-i kitâbdan dört ay mukaddem malımdan mezbûr İstepan’a altmış dört guruşumu ikrâz ve teslîm ol dahi yedimden istikrâz ve kabz etmekle meblağ-ı mezbûrun dört guruşunu mukaddemâ yedinden ahz u kabz edip zimmetinde altmış guruş hakkım bâkī kalmağla hâlâ meblağ-ı bâkī-i mezbûru merkūm İstepan’dan taleb ederim, suâl olunsun dedikde, gıbbe’s-suâl mezbûr İstepan cevâbında târîh-i mezbûrda müdde‘î-i mezbûr İstepan meblağ-ı mezbûru bana emâneten def‘ ü teslîm ben dahi yedinden ahz u kabz edip mahmiye-i mezbûrede Horhor Çeşmesi kurbünde vâki‘ handa sâkin olduğum odamda kendi malım ile bir yerde mahfûz iken bilâ-ta‘ad sirka olundu deyüp meblağ-ı mezbûru müdde‘î-i merkūmdan karz vechi üzere ahz u kabzını inkâr edicek müdde‘î-i mezbûr[dan] müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka müdde‘î-i mezbûr yedinden meblağ-ı mezbûr altmış guruşu karz vechi üzere ahz etmeyip emâneten kabz ve vech-i meşrûh üzere bilâ-ta‘ad yedinden zâyi‘ olduğuna mezbûr İstepan’a yemîn teklîf olundukda ol dahi alâ-vefkı’l-mesûl yemîn billâhillezî enzele’l-İncîle alâ-İsâ -aleyhi’s-selâm- etmeğin mûcebince müdde‘î-i merkūm Avak meblağ-ı mezbûr talebiyle bilâ-beyyine bî-vech mu‘ârazadan men‘ birle mâ vaka‘a bi’t-taleb ketb olundu. Fî-selhi Cumâdelûlâ sene sitte aşere ve mi’e ve elf. Şuhûdü’l-hâl: Mehmed Efendi kādızâde, Ömer Efendi kâtib, Emin Mehmed Efendi kâtib, Veli Efendi kâtib, el-Hâc Yusuf b. Osman, Mosis v. Maksi, Bağdasar v. Tedmür?, Maroş v. ( ), Cihânşah v. Filyoz.