Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 402 Hüküm no: 403 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa’nın Patrik Mardıros’da olan alacağının kendisinden veya kefili Sokyas’tan tahsil edilmesi Bi-ismihî sübhânehu Kad ebtedi‘u min-haze’l-varak ilâ-tescîli’l-vekāyi‘i fî-zemeni a‘lemi’l-ulemâi’l-mütebahhirîn efdalü’l-fuzalâi’l-müteverri‘în hazret-i Yahya Efendi b. el-müvellâ el-merhûm Salih Efendi el-kādı bi-askeri Rumeli yevme izin sâlisen bi-mübâşereti’l-fakīr Sunullah b. Ali el-memûru bi-istimâ‘i’l-umûri’ş-şer‘iyyeti’l-askeriye -Gufira lehümâ- Medîne-i Gelibolu ahâlîsinden bâ‘isü’l-kitâb Abdullah Ağa b. Mustafa nâm kimesne mahmiye-i İstanbul’da meclis-i şer‘-i hatîrde mahmiye-i mezbûrda patrik olan Mardıros v. Dinar ve Sokyas v. Minas zimmîler ve aralarında üzerlerine da‘vâ ve takrîr-i kelâm edip benim işbu patrik-i mesfûr zimmetinde cihet-i karzdan bin guruş ve yedimden iştirâen kabz eylediği evsâfları beynimizde ma‘lûm iki re’s at semenlerinden üç yüz guruş ki cem‘an bin üç yüz guruş hakkım olup ve meblağ-ı merkūm bin üç yüz guruşa mezbûr Sokyas emr u kabûlü hâviye kefâlet-i sahîha-i şer‘iyye ile kefil olmağla hâlâ meblağ-ı merkūmu asâlet ve kefâletlerine binâen merkūmân Mardıros ve Sokyas’dan taleb ederim suâl olunsun dedikde, gıbbe’s-suâl mezbûr Mardıros cevâbında müdde‘î-i mezbûra cihet-i karzdan dokuz yüz guruş ve sâlifü’z-zikr atlar semenlerinden üç yüz guruş ki cem‘an bin iki yüz deyni olduğunu ve mesfûr Sokyas dahi ber-vech-i muharrer meblağ-ı merkūm bin iki yüz guruşa kefil olduğunu her biri ikrâr ziyâde eylediği yüz guruşu inkâr etmeleriyle müdde‘î-i mezbûr Abdullah Ağa’dan ziyâde müdde‘âsına beyyine taleb olundukda ityân-ı beyyine için istimhâl etmeğin mehl-i şer‘î ile ba‘de’l-imhâl ikrârları mertebesi olan meblağ-ı merkūm bin iki yüz guruşu asâlet ve kefâletlerine binâen mezbûr Abdullah Ağa’ya edâ ve teslîme mesfûrân Mardıros ve Sokyas’a ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâlis min-Cumâdelâhir li-sene sitte aşere ve mi’e ve elf. Şuhûdü’l-hâl: Mehmed Emin Efendi b. Ahmed, İsmail Efendi Sandalcızâde, el-Hâc Yusuf b. Osman, Şehri Ali Çavuş el-mübâşir.