Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 402 Hüküm no: 404 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ali’nin yanında bulunan küçük çocukları Mehmed ve Fatıma için nafaka takdir olunması El-emrü kemâ zükira fîhi nemekahu’l-fakīr ileyhi te‘âlâ Yahya el-kādı bi-askeri Rumeli -ufiye anhü- Mahmiye-i İstanbul’da Hoca Üveys mahâllesi sâkinelerinden râfi‘atü’l-vesîka Âişe bt. Ali nâm hatun mahmiye-i mezbûrede meclis-i şer‘de takrîr-i kelâm ve ta‘bîr ani’l-merâm edip zevc-i mutallıkım Za‘îm İbrahim Ağa b. Mustafa’nın firâşından hâsıla ve benden mütevellide olup hâlâ bi-hükmi’l-hıdâne hacr ve terbiyemde olan işbu sagīr oğlu Mehmed ile sagīre kızım Fâtıma’nın nafaka ve kisveye ihtiyâçları olmağla sagīrân-ı mezbûrân için babaları merkūm İbrahim Ağa üzerine kıbel-i şer‘den kadr-ı kifâye nafaka ve kisve-baha farz ve takdîr olunmak matlûbumdur dedikde hâkim-i muvakkı‘-ı sadr-ı kitâb bi-tevkī‘ihi’ş-şerîfi’l-müstetâb tûbâ lehû ve hüsnü-meâb hazretleri dahi sagīrân-ı mezbûrânın her biri için târîh-i kitâb gününden babaları merkūm İbrahim Ağa üzerine beher yevm kırkar akçe nafaka ve kisve-baha farz ve takdîr edip meblağ-ı mefrûz-ı mezkûru sagīrân-ı merkūmânın nafaka ve kisve ve sâir levâzım-ı zarûriyesine harc u sarfa ve vakt-i zarûretde istidâneye ve lede’z-zafer rücû‘a mezbûre Âişe Hatun’a izin vermeğin mâ vaka‘a bi’t-taleb ketb olundu. Fî-gurreti Cemâziyelâhir li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, Hasan Efendi b. Mehmed, Ali Çelebi b. Hüseyin, Kâtib Ahmed Çelebi b. Mustafa, Hasan Beşe b. Hüseyin, Mustafa b. Mehmed, Hasan Çelebi b. Abdullah.