Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 403 Hüküm no: 405 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Yusuf’un eşi Ali’den muhalaa yoluyla boşanması Havâss-ı refî‘a kazâsı muzâfâtından kasaba-i Hasköy’de el-Hâc Şaban mahâllesinde sâkine olup zâtı mahâlle-i mezbûre sâkinlerinden Hüseyin b. Mehmed ve Hasan b. Hüseyin nâm kimesneler ta‘rîfleriyle mu‘arrefe olan Fâtıma bt. Yusuf nâm hatun mahmiye-i İstanbul’da meclis-i şer‘-i hatîrde zevc-i muhâli‘i bâ‘isü’l-kitâb es-Seyyid Ali b. es-Seyyid İbrahim b. es-Seyyid Mehmed nâm kimesne tarafından husûs-ı âti’l-beyana vekîl olduğu şâhidân-ı mezbûrân şehâdetleriyle şer‘an sâbit ve sübût-ı vekâletine hükm-i şer‘î lâhık olan Abdurrahman Çelebi b. Mustafa nâm kimesne mahzarında ikrâr ve takrîr-i kelâm [edip] zevcim müvekkil-i mezbûr es-Seyyid Ali ile beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan sekiz yüz akçe mehr-i müeccelim üzerine ve nafaka-i iddet-i ma‘lûmem ve meûnet-i süknâm dahi kendi üzerime olmak üzere zevcim müvekkil-i mezbûr ile hul‘u ve her birimiz hul‘-ı mezbûru kabûl eylediğimizden sonra hukūk-ı zevciyete ve sâire müte‘allıka âmme-i da‘vâdan her birimiz âharı ibrâ-i âm ve kātı‘ü’n-nizâ‘la ibrâ ve iskāt eyledik, fîmâ-ba‘d birbirimiz ile aslâ da‘vâ ve nizâ‘ ve husûmetimiz kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi min-Cemâziyelâhir li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi b. Sandalcızâde, Ömer Efendi b. Ali, el-Hâc Yusuf b. Osman.