Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 404 Hüküm no: 407 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasandra bt. Kosta’nın Londi v. Kiro’ya olan borcunun tecil edilmesi Mahmiye-i İstanbul’da Edirnekapısı dâhilinde sâkine olup zâtı ma‘rifet-i şer‘iyye ile ârifân olan Ali Beşe b. Mustafa ve Mustafa Beşe b. Mehmed nâm kimesneler ta‘rîfleriyle mu‘arrefe olan Kasandra bt. Kosta nâm Nasrâniye mahmiye-i mezbûrede meclis-i şer‘-i şerîfde işbu râfi‘ü’s-sifr Londi v. Kiro nâm zimmî muvâcehesinde ikrâr ve takrîr-i kelâm edip zevcim hâzır bi’l-meclis Todori v. Nikola nâm zimmînin mezbûre Londi’ye cihet-i deyn-i şer‘îden otuz altı bin akçe deyn olup meblağ-ı mezbûra bundan akdem ben tarafeynden emr u kabûlü hâviye kefâlet-i sahîha-i şer‘iyye ile kefil ve meblağ-ı mezbûr min-ciheti’l-kefâleti’l-mezkûre mezbûr Londi’ye zimmetimde lâzımü’l-edâ deynim olup lâkin meblağ-ı mezbûru merkūm Londi’ye hâlâ ve def‘aten edâya iktidârım olmayıp taksît ve tecîle tâlib olduğumda ol dahi her yüz seksen gün tamâmında kendüye altışar bin akçe verip meblağ-ı mezkûru târîh-i kitâbdan cem‘an bin seksen gün tamâmına değin kendüye tamâmen edâ ve teslîm etmek üzere beni taksît ve tecîl ben dahi taksît ve tecîl-i mezbûru kabûl eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min-Cemâziyelâhire li-sene sitte aşere ve mi’e ve elf. Şuhûdü’l-hâl: Ali Beşe b. Mustafa, Mustafa Beşe b. Mehmed, Halil Beşe b. Mehmed, Hasan b. Mehmed, İvaz b. Abdullah, Papa Hıristor v. Yani, Kiro v. Dimo, Londer v. Yorgi.