Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 405 Hüküm no: 408 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in Mehmed Bey’in zimmetini ibra etmesi Erzurum sancağında kurâ-i Erzincan nâhiyesinde vâki‘ Paparastik nâm karye ve gayrıdan sekiz bin dört yüz akçe tımârın üç bin akçe hissesine mutasarrıf olan Mustafa Bey b. Abdullah mahmiye-i İstanbul’da meclis-i şer‘de tımâr-ı mezbûrun beş bin dört yüz akçe hissesine mutasarrıf olan işbu râfi‘ü’l-vesîka Mehmed Bey b. İsmail mahzarında ikrâr-ı tam ve takrîr-i kelâm edip zikr olunan sekiz bin dört yüz akçe tımâr bundan akdem babam mezbûr Abdullah’ın üzerinde olup ba‘de-vefâtihî mahlûlünden bâ-berat-ı sultânî mezbûr Mehmed Bey’e tevcîh olundukda ben gelip Dîvân-ı hümâyûn’a arzuhâl eylediğimde tımâr-ı mezbûrun bâ-fermân-ı âlî üç bin akçesi ifrâz ve kānûn üzere babam mahlûlünden bana tevcîh olundukdan sonra mezbûr Mehmed Bey dahi tımâr-ı mezbûrdan üzerinde bâkī kalan beş bin dört yüz akçe hissesini rızâ ve ihtiyârıyla bana kasr-ı yed ve ferâğ edip ben dahi mezbûr Mehmed Bey’e iki def‘a berat ihrâcına ve sâir masârıf-ı ma‘lûmeye harc u sarf eylediği yüz elli guruşu mâlımdan def‘ ü teslîm ol dahi yedimden ahz u kabz ve istihlâk etmişdi. El-hâletü hâzihi ber-vech-i muharrer medfû‘um olan meblağ-ı mezbûr yüz elli guruşa müte‘allıka âmme-i da‘vâ ve kâffe-i mutâlebâtdan mezbûr Mehmed Bey’in zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min-Cemâziyelâhire li-sene sitte aşere ve mi’e ve elf. Şuhûdü’l-hâl: Divriği Beyi oğlu Yusuf Bey, Muradbeyzâde Ömer Efendi, Bâli Çavuşzâde Ömer Efendi, Çiftçizâde Molla Mehmed, Şeyh Kasımzâde İsmail.