Bab Mahkemesi 54 Numaralı Sicil (H. 1102 / M. 1691) cilt: 20, sayfa: 375 Hüküm no: 454 Orijinal metin no: [80a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın Havva bt. Abdullah’ın alacağına kefil olduğu iddiasının reddi Mahmiye-i İstanbul’da Langa kurbunda sâkin Hasan b. Abdullah nâm kimesne meclis-i şer‘-i şerîf-i enver ve mahfil-i dîn-i münîf-i ezherde, işbu râfi‘atü’l-kitâb Havva bt. Abdullah nâm hâtun mahzarında üzerine da‘vâ ve takrîr-i kelâm edip, mezbûre Havva’nın sadriye kebîre kızı gāibe ani’l-meclis Sâime bt. Mehmed nâm hâtunun bundan akdem yedimden müşterâ ve makbûz nev‘ ve cinsi beynimizde ilm-i şer‘î ile ma‘lûm emti‘a-i mütenevvi‘a bahâlarından zimmetinde beş bin beş yüz akçe hakkıma mezbûre Havva tarafeynden emr ve kabûlü hâvî kefâlet-i sahîha-i şer‘iyye ile kefîl olmuşdu. Hâlâ meblağ-ı mezbûru mezbûre Havva’dan kefâletine binâ’en taleb ederim suâl olunup alıverilmesi matlûbumdur dedikde, gıbbe’s-suâl mezbûre Havva cevâbında kefâlet-i merkūmeyi bi’l-külliye inkâr edicek, müdde‘î-i mezbûrdan da‘vâsına mutâbık beyyine taleb olundukda, ityân-ı beyyineden izhâr-ı acz ile istihlâf etmeğin, mezbûre Havva’ya müdde‘î-i mezbûrun gāibe-i mezbûre zimmetinde vech-i muharrer üzre eşyâ-i mütenevvi‘a bahâlarından olan beş bin beş yüz akçe hakkına minvâl-i meşrûh üzre kefîl olmayıp ol vechile müdde‘î-i mezbûre edâsı lâzım deyni olmadığına mezbûre Havva’ya yemîn teklîf olundukda, ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin, mûcebince müdde‘î-i mezbûr bilâ-beyyine mezbûre Havva’ya bî-vech mu‘ârazadan men‘ olunup, mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Cumâdelâhire li sene 1102. Şuhûdü’l-hâl: İbrahim Çelebi b. Ahmed, Ebûbekir b. ( ), Mustafa b. Şaban, Ali b. Bâli ve gayruhüm.