Bab Mahkemesi 54 Numaralı Sicil (H. 1102 / M. 1691) cilt: 20, sayfa: 373 Hüküm no: 453 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ahmed Çelebi b. Seyyid Abdülhâlik’in hür olduğu sabit olan cariye için ödediği parasının iadesi Mahmiye-i İstanbul’da Emin Bey mahallesi sükkânından es-Seyyid Ahmed Çelebi b. el-merhûm es-Seyyid Abdülhâlik meclis-i şer‘-i kavîmde, yine mahalle-i mezbûre sükkânından Solak Süleyman Çelebi b. Hüseyin nâm kimesne mahzarında üzerine da‘vâ ve takrîr ve kelâm edip, mezbûr Süleyman Çelebi orta boylu açık kaşlı kara gözlü Ayşe nâm mevsûfe câriye-i memlûkesi olmak üzre bundan akdem seksen beş guruşu semen-i medfû‘a bana bey‘ ve teslîm, ben dahi ba‘de’l-iştirâ ve’t-tesellüm mevsûfe-i mezbûreyi esirci Âlime nâm hâtuna yine semen-i mezbûr seksen beş guruşa bey‘ ve teslîm, ol dahi ba‘de’l-iştirâ ve’t-tesellüm yine mezbûr seksen beş guruşa Fâtıma nâm hâtuna bey‘ ve teslîm, ol dahi ba‘de’l-iştirâ ve’t-tesellüm seksen guruş semen-i medfû‘a Esirci Mehmed nâm kimesneye bey‘ ve teslîm, ol dahi ba‘de’l-isbât ve’l-half ve’l-hükm-iştirâ ve’t-tesellüm doksan guruş semen-i medfû‘a İbrahim Beşe nâm kimesneye bey‘ ve teslîm, ol dahi iştirâ ve tesellüm ettikden sonra mevsûfe-i mezbûre kendiye vâzı‘u’l-yed olan mezbûr İbrahim Beşe yedinde iken ben vilâyet-i Rumeli’nde medîne-i Belgrad tevâbi‘inden Berkofça Kasabası re‘âyâsından hürrü’l-asl olan Şoride nâm zimmînin firâşından hâsıl ve zevcesi Dimo nâm hürretü’l-asldan mütevellide sulbiye kızı olup hürrü’l-aslım, da‘vâ ve müdde‘âsına huzûr-ı hâkimü’ş-şer‘de şuhûd-ı udûlle isbât ve hürriyetine hükm-i şer‘î lâhık olup, mezbûr İbrahim Beşe’nin kasr-ı yedine tenbîh ve sebîli tahliye olunmağın, mezbûr İbrahim Beşe dahi mürâca‘at edip mezbûr Mehmed’e semen olmak üzre medfû‘u olan meblağ-ı mezbûr doksan guruşa da‘vâ ve hükm-i hâkimü’ş-şer‘le ahz u kabz edip, ol dahi mezbûre Fâtıma’ya semen olmak üzre medfû‘u olan meblağ-ı mezbûr seksen guruşa bi hükmi’l-mürâca‘a ahz u kabz edip, ol dahi mezbûre Âlime’ye semen olmak üzre medfû‘u olan mezbûr seksen beş guruşa bi hükmi’l-mürâca‘a ahz u kabz edip, ol dahi semen deyu verdiği meblağ-ı mezbûr seksen beş guruşu mürâca‘at edip, ba‘de’l-hükm benden ahz u kabz etmekle, hâlâ ben dahi merkūm Süleyman Çelebi’ye medfû‘um olan meblağ-ı mezbûr seksen beş guruşa bi’l-mürâca‘a taleb ederim suâl olunup alıverilmesi matlûbumdur, dedikde gıbbe’s-suâl mezbûr Süleyman Çelebi cevâbından ben mevsûfe-i mezbûreyi târih-i kitâbdan dört sene mukaddem medîne-i Belgrad’da Acem Hanı’nda sâkin tâife-i tüccârdan Ali Çelebi b. Abdullah nâm kimesneden seksen beş guruş semen-i medfû‘a iştirâ ve kabz ettiğimden sonra bundan akdem mezbûr es-Seyyid Ahmed Çelebi’ye kezâlik semen-i mezbûr seksen beş guruşa bey‘ ve teslîm ve kabz-ı semen eyledim deyu ikrâr, lâkin vech-i muharrer üzre isbât-ı hürriyet eden mevsûfe-i mezbûre kendinin bi aynihâ mezbûr Ahmed Çelebi’ye bey‘ eylediği mevsûfe olduğunu inkâr edicek, müdde‘î-i mezbûrdan müdde‘âsına muvâfık beyyine taleb olundukda, udûl-i ahrâr-ı müslimînden olup mahmiye-i mezbûrede Pirinçci Sinan mahallesinde sâkin Mehmed Efendi b. Sefer ve yine zikr olunan Emin Bey mahallesi sükkânından Mustafa Beşe b. Hasan nâm kethüdâ li ecli’ş-şehâde meclis-i şer‘a hâzırân olup isre’l-istişhâd, fi’l-hakīka müdde‘î-i mezbûr es-Seyyid Ahmed Çelebi işbu mezbûr Süleyman Çelebi’den mevsûfe-i mezbûre bey‘ ve teslîm Ayşe’yi meblağ-ı mezbûr seksen beş guruş semen-i medfû‘a iştirâ ve kabz ettiğinden sonra mezbûre Ayşe’yi yine meblağ-ı mezbûr seksen beş guruş semen-i medfû‘a [bey‘], ol dahi ba‘de’l-iştirâ ve’t-tesellüm mezbûre Fâtıma’ya yine meblağ-ı mezbûr seksen beş guruş semen-i medfû‘a bey‘ ve teslîm, ol dahi ba‘de’l-iştirâ ve’t-tesellüm merkūm Mehmed’e seksen guruş semen-i medfû‘a bey‘ ve teslîm, ol dahi ba‘de’l-iştirâ ve’t-tesellüm İbrahim Beşe’ye doksan guruş semen-i makbûza bey‘ ve teslîm ol dahi iştirâ ve kabz ettiğinden sonra mevsûfe-i mezbûre Ayşe mezbûr İbrahim Beşe yedinde iken bâlâda tafsîli mürûr ettiği üzre hürrü’l-asl olduğu ba‘de’l-isbât ve’l-hükm mezbûr İbrahim Beşe merkūm Mehmed’e medfû‘u olan meblağ-ı mezbûr doksan guruşu bi hükmi’l-mürâca‘a ahz u kabz edip, ol dahi mezbûre Fâtıma’ya medfû‘u olan meblağ-ı mezbûr seksen guruşu bi hükmi’l-mürâca‘âti ahz u kabz edip, ol dahi mezbûre Âlime’ye medfû‘u olan semen-i mezbûr seksen beş guruş mürâca‘at edip, ba‘de’l-hükm ahz u kabz, ol dahi müdde‘î-i mezbûr Seyyid Ahmed Çelebi’ye medfû‘u olan semen-i mezbûr seksen beş guruşu mürâca‘at edip ba‘de’l-hükmi’ş-şer‘î ahz u kabz eylediği mevsûfe-i mezbûreyi bi aynihâ işbu merkūm Süleyman Çelebi’nin müdde‘î-i mezbûr es-Seyyid Ahmed Çelebi’ye meblağ-ı mezbûr seksen beş guruş semen-i medfû‘a bey‘ ve teslîm ve kabz-ı semen eylediği mevsûfe-i mezbûre Ayşe’dir, biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye ettiklerince ba‘de’t-ta‘dîl ve’t-tezkiye şehâdetleri makbûl olmağın, mûcebince ba‘de’l-hükm ve’t-tenbîh mâ vaka‘a bi’t-taleb ve’l-ibtiğā ketb ü imlâ olundu. Fi’l-yevmi’r-râbi‘ ve’l-ışrîn min Cumâdelâhire li sene 1102. Şuhûdü’l-hâl: İbrahim Çelebi b. Ahmed, Mustafa b. Şaban, el-Hâc Siyavuş b. Abdullah, Abdullah Efendi el-kâtib, Hoca Mehmed Efendi el-kâtib, Nasuh b. Hasan, Musa Çelebi b. Mehmed, el-Hâc Ali b. Abdullah, Muharrem b. Mehmed, Osman b. Hasan, Ali b. Bâli ve gayruhüm.