Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 503 Hüküm no: 527 Orijinal metin no: [129a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taraklıborlu kasabası ahalisinden Ayşe bt. Mehmed’in aynı kasabada bulunan dükkânını kira vermeden işgal eden Ebubekir b. Salih aleyhindeki davasında sulh Vilâyet-i Anadolu’da Taraklıborlu kasabası mahâllâtından Hüseyin Kethüda mahâllesi sâkinelerinden Âişe bt. es-Seyyid Mehmed b. Emir Hoca tarafından husûs-ı âti’l-beyana vekîl olduğu kasaba-i merkūme muzâfâtından Kurban nâm karye ahâlîsinde olup zâtı mezbûreyi ma‘rifet-i şer‘iyye ile ârifân olan el-Hâc Ebubekir b. el-Hâc Salih ve Mustafa b. Ahmed şehâdetleriyle şer‘an sâbit olan zevci Mustafa el-Hâc Mehmed mahmiye-i İstanbul’da meclis-i şer‘de kasaba-i mezbûre ahâlîsinden işbu bâ‘isü’l-kitâb el-Hâc Hüseyin b. el-Hâc Hüseyin mahzarında bi’l-vekâle üzerine da‘vâ ve takrîr-i kelâm edip işbu mezbûr el-Hâc Hasan müvekkilim zevcem mezbûre Âişe Hatun’un kasaba-i mezbûrda dericiler sûkunda vâki‘ mu‘addün li’l-istiğlâl olan bir bâb mülk demirci dükkânını on iki sene fuzûlî zabt ve tasarruf etmekle hâlâ dükkân-ı mezbûrûn senede beşer guruşdan altmış guruş ecr-i mislini mezbûr el-Hâc Hasan’dan [129b] taleb eylediğimde edâdan imtinâ‘ eder, suâl olunup alıverilmek bi’l-vekâle matlûbumdur dedikde gıbbe’s-suâl mezbûr el-Hâc Hasan cevâbında işbu vekîl-i mezbûr Mustafa’nın zevcesi müvekkile-i merkūme Âişe Hatun târîh-i kitâbdan üç ay mukaddem kasaba-i mezbûrda ber-vech-i muharrer dükkân-ı mezbûrûn ecr-i mislini benden taleb ve da‘vâ etdiğinde ben dahi inkâr etmekle nizâ‘-ı kesîre vukū‘undan sonra vesâtet-i muslihîn ile mezbûre Âişe Hatun da‘vâ-i mezkûresinden benimle on guruş bedel-i makbûza sulh olup dükkân-ı mezbûrun ücretine müte‘allıka âmme-i da‘vâdan zimmetimi ibrâ ve iskāt etmiş idi deyü def‘ ile mukābele etmeğin gıbbe’l-istintâk ve’l-inkâr mezbûr el-Hâc Hasan’dan def‘-i mezkûresine beyyine talep olundukda udûl-i Müslimînden ve kasaba-i mezbûre ahâlîsinden Ali b. Ramazan ve Mustafa b. Mehmed nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ işbu müdde‘î-i mezbûr Mustafa’nın zevcesi müvekkile-i mezbûre Âişe bt. Mehmed b. Emir Hoca târîh-i kitâbdan üç ay mukaddem kasaba-i mezbûrda mu‘addün li’l-istiğlâl olan demirci dükkânımı on iki sene fuzûlî zabt etmişidin deyü senede beşer guruşdan dükkân-ı mezbûrun altmış guruş ecr-i mislini işbu mezbûr el-Hâc Hasan’dan taleb ve da‘vâ etdiğimde ol dahi inkâr etmeğin beynlerinde nizâ‘-ı kesîre vukū‘undan sonra vesâtet-i muslihîn ile mezbûre Âişe Hatun da‘vâ-i mezkûresinden mezbûr el-Hâc Hasan ile on guruş bedel-i makbûza sulh olup zikr olunan dükkânın ücretine müte‘allıka âmme-i da‘vâdan işbu mezbûr el-Hâc Hasan’ın zimmetini ibrâ ve iskāt eyledi biz bu husûsa bu vech [üzere] şâhidleriz şehâdet dahi ederiz deyü her biri edâ-i şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcibince ba‘de’l-hükm müdde‘î-i mezbûr Mustafa bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Recebi’l-mürecceb li-sene sitte aşere ve mi’e ve elf. Şuhûdü’l-hâl: es-Seyyid el-Hâc Mehmed b. Ramazan, el-Hâc Murad Ağa b. el-Hâc Ramazan, Hasan Bey b. Abdurrahman , Teberdâr Hüseyin Çavuş b. Muslı, Mustafa Dede b. el-Hâc Halil.