Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 502 Hüküm no: 526 Orijinal metin no: [129a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın, müteveffa zevci Mustafa’ya borcu olduğu iddiasıyla Hatice Hatun’un açtığı davayı ispatlayamadığı Mahmiye-i İstanbul’da Küçükkaraman kurbünde sâkin iken bundan akdem fevt olan Mustafa b. İbrahim nâm kimesnenin verâseti zevce-i metrûkesi Hadîce b. Ali nâm hatun ile sulbî sagīr oğlu Mehmed ve sadriye sagīre kızı Âişe’ye münhasıra olduğu şer‘ân zâhir ve mütebeyyin oldukdan sonra kendi tarafından asıl ve sagīrân-ı mezbûrânın vâlideleri ve tesviye-i emrlerine kıbel-i şer‘den mansûbe vasîleri olan mezbûre Hadîce Hatun ba‘de’t-ta‘rîfi’ş-şer‘î mahmiye-i mezbûrede meclis-i şer‘-i enverde işbu bâ‘isü’l-vesîka Haseki Mustafa Ağa b. Ali mahzarında bi’l-asâle ve bi’l-vesâye üzerine da‘vâ ve takrîr-i kelâm edip mezbûr Mustafa Ağa zevcim müteveffâ-yı mezbûrdan hayâtında üç yüz yetmiş guruş iktirâz ve kabz ve istihlâk eylediğinden sonra zevcim mezbûr meblağ-ı merkūmu kable’l-isitîfâ vefât edip meblağ-ı mezbûr ırsen bana ve sagīrân-ı mezbûrâna intikāl etmeğin hâlâ meblağ-ı mezbûru asâleten ve vesâyeten merkūm Mustafa Ağa’dan taleb eylediğimde edâdan imtinâ‘ eder suâl olunup alıverilmesi murâdımdır dedikde gıbbe’s-suâl ve akībe’l-inkâr müdde‘iye-i mezbûreden takrîr-i meşrûhuna mutâbıka beyyine taleb olundukda ityân-ı beyyine için istimhâl etmeğin mehl-i şer‘î birle ba‘de’l-imhâl müddet-i mehl mürûr edip müdde‘iye-i mezbûre Hadîce ityân-ı beyyineden izhâr-ı acz ile istihlâf etmeğin fi’l-hakīka müteveffâ-yı mezbûr Mustafa’dan hayâtında üç yüz yetmiş guruş iktirâz ve kabz etmeyip ve ol vechile meblağ-ı mezkûrun edâsı üzerine lâzım gelmediğine merkūm Mustafa Ağa’ya yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcibince müdde‘iye-i mezbûre Hadîce bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’r-râbi ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Ahmed Efendi b. Mehmed Efendi, Mehmed Efendi b. Abdullah, Osman Çelebi b. Halil, Salih Çelebi b. Mustafa, Mustafa Çelebi b. Salih, Ahmed Ağa b. Halil, Abdurrahman Efendi b. Abdüllatif, Ömer Ağa el-mübâşir, el-Hâc Yusuf b. Osman.