Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 507 Hüküm no: 530 Orijinal metin no: [130b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza b. Veliyüddin’nin varislerinin azatlı cariyesi Havva ile olan davalarında sulh olduğu Mahmiye-i İstanbul’da Lâleliçeşme kurbünde sâkin iken bundan akdem vefât eden el-Hâc Hamza b. Veliyüddin’in li-ebeveyn karındaşı ve hâsran vârisi olan Halil Çelebi b. Cafer nâm kimesne mahmiye-i mezbûrede meclis-i şer‘de müteveffâ-yı mezbûrun atikası işbu bâ‘isü’l-vesîka Havva bt. Abdullah nâm hatun mahzarında ikrâr ve takrîr-i kelâm edip mûrisim müteveffâ-yı mezbûr el-Hâc Hamza atikası mezbûre Havva ile menzilinde sâkin iken vefât etmekle mûrisim müteveffâ-yı mezbûrun Belkıs nâmında bir câriyesini ve terekesinden çukaya kaplı nâfe kürk ve bir çuka çakşır ve bir nîmten kürkü ve bir kontuş ve esâs-ı beyt ve evânî-i nühâsiye ve gayr-ı nühâsiye bi’l-cümle eşyâsını mezbûre Havva ahz u kabz etmeğin ben husûs-ı mezbûru verâsetim hasebiyle bundan akdem mezbûre Havva Hatun’dan da‘vâ ve taleb eylediğimde ol dahi cevâbında mevlâm müteveffâ-yı mezbûr hayâtında câriye-i mezbûre ile eşyâ-i mezkûremi bana hibe ve temlîk ve teslîm etmişidi deyü bu vechile beynimizde münâza‘ât-ı kesîre vâkı‘â olmuş idi el-hâletü hâzihi ben da‘vâ-i mezbûrumdan fâriğā olup husûs-ı mezbûra müte‘allıka âmme-i da‘vâdan mezbûre Havva Hatun’un zimmetini ibrâ ve iskāt eyledim min-ba‘d mezbûre Havva Hatun ile husûs-ı mezbûra müte‘allıka da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi‘t-taleb ketb olundu. Fi’l-yevmi’s-sâdis ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Mehmed Ağa b. Osman, Berber Mustafa b. Abdullah, Berber Ali Çelebi b. Abdülmennan, Haffâf Hasan Bey b. ( ), Veliyüddin Efendi b. Ali, Mehmed Emin Efendi el-Kâtib, el-Hâc Yusuf b. Osman.