Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 507 Hüküm no: 531 Orijinal metin no: [130b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefat etmeden önce Rus asıllı kölesini azat ettiği Medîne-i Ebâ Eyyûbe’l ensârî -aleyhi’r-rahmetü’l-Bârî- mahâllâtından Fethi Çelebi mahâllesinde sâkine iken bundan akdem fevt olan Âişe bt. Hüseyin nâm hatunun sadriye kebîre kızı Hamide Hatun bt. Hüseyin nâm hatun zatı ba‘de’t-ta‘rîfi’ş-şer‘î mahmiye-i İstanbul’da meclis-i şer‘de vâlidesi müteveffât-ı mezbûre Âişe Hatun’un mu‘takı işbu râfi‘ü’l-vesîka orta boylu açık kaşlı elâ gözlü sarı sakallı Rusiyyü’l-asl Yusuf b. Abdullah mahzarında ikrâr ve takrîr-i kelâm edip vâlidem müteveffât-ı mezbûre Âişe Hatun hayâtında işbu mezbûr Yusuf’u mülkünde olduğu hâlde kendüye iki yüz guruş vermek üzere kitâbete kat‘ edip ol dahi ba‘de’l-kabûl vâlidem müteveffât-ı mezbûre Âişe Hatun bedel-i mezbûru kable’l-ahz ve’l-istîfâ fevt olmuş idi deyü bedel-i kitâb-ı mezkûr iki yüz guruşu bundan akdem mezbûr Yusuf’dan taleb ve da‘vâ üzere idim, el-hâletü hâzihi mezbûr Yusuf bedel-i mezbûr iki yüz guruşu vâlidem mezbûre Âişe Hatun’a hayâtında tamâmen edâ ve teslîm eylediği ma‘lûmum olmağla bedel-i mezkûra müte‘allıka âmme-i da‘vâdan mezbûr Yusuf’un zimmetini ibrâ ve iskāt eyledim, hâlâ mezbûr [Yu]suf’da kat‘â alâka ve medhalim olmayıp sâir ahrâr-ı asliyyîn gibi hürdür, dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, el-Hâc Mehmed Efendi b. Ahmed, İsmail Efendi b. el-kādı, Ömer Efendi el-kādı, Veliyyüdîn Efendi el-kādı, Mehmed Efendi el-kâtib.