Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 508 Hüküm no: 533 Orijinal metin no: [131a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacca giderken vefat eden Silivri mahallesinde sakin Mısırlı Ahmed Ağa’nın miras taksimi Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden irsâl olunan Mevlânâ el-Hâc Mehmed Efendi b. Ahmed mahmiye-i İstanbul’da Silivri mahâllesinde Mustafa Ağa b. Süleyman’ın menziline varıp zeyl-i vesîkada muharrerü’l-esâmi Müslimîn huzûrunda akd-i meclis-i şer‘-i hatîr etdikde mahmiye-i mezbûre ahâlîsinden ve hayme-i hâssa mehterbaşısı olup bundan akdem tarîk-i hâcc-ı şerîfde vefât eden Mısırlı Ahmed Ağa b. Yusuf b. Abdurrahman’ın verâseti zevcesi Âişe bt. Abdullah ile sulbiye kızı Hadîce’ye ve li-ebeveyn karındaşı İbrahim Ağa’ya münhasıra olup ba‘dehû mezbûre Hadîce dahi vefât edip verâseti zevci Hasan Ağa b. Mustafa ile vâlidesi mezbûre Âişe’ye ve sadriye kızı Ümmügülsüm’e ve ammi mezbûr İbrahim Ağa’ya münhasır olup ve ba‘dehâ mezbûr İbrahim Ağa dahi fevt verâseti zevcesi mezbûre Âişe ile sulbî kebîr oğlu Ahmed Çelebi ve sulbiye kebîre kızı Fâtıma’ya münhasıra ve tashîh-i meseleleri bi-tarîkı’l-münâsahati’ş-şer‘iyye iki yüz seksen sekiz sehmden i‘tibâr olunup sihâm-ı mezbûrûn üç mertebede yetmiş beş sehmi mezbûre Âişe’ye ve otuz altı sehmi mezbûr Hasan Ağa’ya ve yetmiş sehmi mezbûr Ahmed Çelebi’ye ve otuz beş sehmi mezbûre Fâtıma’ya ve yetmiş iki sehmi mezbûre Ümmügülsüm’e isâbeti tahakkukundan sonra mezbûr Ahmed Çelebi kendi asâleten ve vâlidesi mezbûre Âişe tarafından husûs-ı âti’l-beyana vekîl olduğu zâtını ma‘rifet-i şer‘iye ile ârifân Abdurrahman Efendi b. Abdullah ve Mehmed Çelebi b. Abdullah şehâdetleriyle sâbit olmağla vekâleten ve mezbûre Fâtıma tarafından dahi zevci ve kezâlik husûs-ı âti’l-beyana vekîl olduğu şâhidân-ı mezbûrân şehâdetleriyle sâbit olan mûmâ-ileyh Mustafa Ağa b. Süleyman vekâleten meclis-i ma‘kūd-ı mezbûrda Ümmügülsüm tarafından zevci ve kezâlik husûs-ı âti’l-beyana vekîl olduğu yedinde mazmûn-ı müsbet hüccet-i şer‘iyye ile sâbit olan bâ‘isü’l-kitâb el-Hâc Hasan b. Abdurrahman mahzarında her biri ikrâr ve takrîr-i kelâm edip mûrisimiz müteveffâ-yı mezbûr İbrahim Ağa hayâtında müvekkile-i mezbûre Ümmügülsüm’ün ve vâlidesi müteveffât-ı mezbûre Hadîce hâl-i suğrlarında vasîleri olmağla müvekkile-i mezbûre Ümmügülsüm bundan akdem mûrisim müteveffâ-yı evvel-i mezbûr Mısırlı Ahmed Ağa’nın mülkü olup mahâlle-i mezbûrda vâki‘ ma‘lûmü’l-hudûd ve’l-müştemilât birbirine muttasıl dört bâb müteehhilîn odalarından ve hâric-ez-defter olan tereke-i ma‘lûmesinden tashîh-i mezbûr üzere hisse-i ırsiyemi taleb ederim, deyü da‘vâya mütesaddiye olup bu vech üzere beynimizde münâzâ‘at-ı kesîre vâkı‘a olmuş idi el-hâletü hâzihi vesâtet-i muslihîn ile müvekkile-i mezbûre Ümmügülsüm bizimle mûrisimiz müteveffâ-yı mezbûr Mısırlı Ahmed Ağa’nın ile’l-vefât mülkü olup mahâlle-i mezbûrda vâki‘ bir tarafdan tarîk-i hâs ve bir tarafdan Telhîsî Abdullah Ağa bahçesi ve bir tarafdan Fâtıma Hatun mülkü <> ve bir tarafdan tarîk-i âm ile mahdûd bir bâb fevkānî oda ve bir sofa ve dehliz ve bir tahtânî oda ve kenîf ve bir mahzeni ve havlu ve iki tarafı taş duvarı müştemil menzilden tashîh-i mezbûr üzere bizim yüz seksen sehim hisse-i ma‘lûmemiz üzerine sulh oldukda biz dahi vech-i muharrer üzere sulh-ı mezbûru asâleten ve vekâletimiz hasebiyle kabûl ve menzil-i mezbûrda olan hisse-i mezkûremizden kasr-ı yed ve bedel-i sulh olmak üzere müvekkile-i mezbûreye temlîk ve tahsîs ve husûs-ı mezbûra müte‘allıka âmme-i da‘vâdan müvekkile-i mezbûre Ümmügülsüm’ün zimmetini ibrâ-i âmm-ı kātı‘ü’n-nizâ‘la ibrâ ve iskāt edip ol dahi bâlâda zikr olunan husûslara ve husûs-ı mîrâsa müte‘allıka cemî‘ da‘vâdan bizim zimmetlerimizi ibrâ-i âmm-ı kātı‘ü’n-nizâ‘la ibrâ ve iskāt eyledi. Fîmâ-ba‘d birbirimiz ile husûs-ı mîrâsa ve sâire müte‘allıka aslâ da‘vâ ve nizâ‘ımız kalmayıp her birimiz âharı ibrâ ve iskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Hasan b. Mustafa ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Recebi’l-ferd sene sitte aşere ve mi’e ve elf. Şuhûdü’l-hâl: Mehmed Ağa b. Abdullah, Ramazan Beşe b. Nesîmî, Ahmed Çavuş Yazıcı b. Mehmed, Hasan b. Hüseyin, Abdullah Efendi [b.] Hızır, Ömer b. Mehmed, Mahmud b. Abdullah, Hasan b. Mustafa. Sah sah sah