Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 510 Hüküm no: 534 Orijinal metin no: [131b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa İbrahim’in varisi olduğunu iddia eden İbrahim b. Bayezid’in davasının tescili Derûn-ı hüccetde mezkûre olan Kadriye zevi’l-erhâmdan olup sehven idhâl olunmağla tashîh olunmuşdur. Fî-Şa‘bân sene [1]116 [mühür] Fi’l-asl vilâyet-i Rumeli’nde Arnavud Belgradı kazâsına tâbi Tümür nâm karye ahâlîsinden olup mahmiye-i İstanbul’da Eğrikapı kurbünde sâkin iken bundan akdem vefât eden Hamamcı el-Hâc İbrahim b. Mehmed b. İlyas’ın vech-i âtî üzere vârisi olduğunu iddi‘â eden Bâyezid b. Hüseyin b. İlyas <> tarafından kezâlik vekâlet iddi‘â eden bâ‘isü’l-kitâb Mustafa b. Abdullah nâm kimesne mahmiye-i mezbûrede meclis-i şer‘-i hatîrde Hüseyin b. Ali nâm kimesne mahzarında üzerine da‘vâ ve takrîr-i kelâm edip müvekkilim mezbûr İbrahim, müteveffâ-yı mezbûr Hamamcı el-Hâc İbrahim’in ammisi Hüseyin’in oğlu Bâyezid’in sulbî oğlu olup müteveffâ-yı mezbûr Hamamcı el-Hâc İbrahim’in babası mezbûr Mehmed ile mezbûr İbrahim’in babası Bâyezid’in babası Hüseyin li-ebeveyn karındaşlar olup babaları ismi mezbûr İlyas ve dedeleri ismi Ahmed ve vâlideleri ismi Saliha bt. Abdullah ve maskat-ı re’sleri kazâ-i mezbûra tâbi sâlifü’z-zikr Tümür nâm karyede müteveffâ-yı mezbûrun verâseti zevce-i metrûkesi ile usûbet-i nesebiye cihetinden mezbûr İbrahim’e münhasır ve ben mezbûr İbrahim tarafından mezbûr Hüseyin zimmetinde müteveffâ-yı mezbûrun cihet-i karz-ı şer‘îden hakkı olan yüz guruşdan hisse-i ırsiye-i şer‘iyyelerini ve sâir tereke-i müteveffâ-yı mezbûra vâzı‘ü’l-yed olanlardan hisselerini talep ve da‘vâ ve ahz u kabza ve kendülere îsâl ve teslîme ve lede’l-iktizâ sulh ve ibrâya ve bunlar mütevakkıf olduğu umûrun küllîsine vekîl olmağla hâlâ meblağ-ı merkūm yüz guruşdan müvekkilim mezbûr İbrahim’in hissesine isâbet eden yetmiş beş guruşu mezbûr Hüseyin’den bi’l-külliye talep ederim suâl olunsun dedikde gıbbe’s-suâl, mezbûr Hüseyin cevâbında fi’l-hakīka cihet-i mezkûreden müteveffâ-yı mezbûr Hamamcı el-Hâc İbrahim ol mikdâr deyni olduğunu ikrâr lâkin müvekkile-i mezbûrun vech-i meşrûh üzere verâseti müdde‘î-i mezbûrun vekâletini dahi inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden ve kazâ-i mezbûra tâbi‘ Lobişe nâm karyeden olup mahmiye-i mezbûrede müsâferet vechi üzere sâkin olan Mehmed b. Hasan ve yine kazâ-i mezbûra tâbi‘ Püsren nâm karyeden olup kezâlik mahmiye-i mezbûrede müsâferet vechi üzere sâkin olan Fazlı b. İskender nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka fi’l-asl vilâyet-i Rumeli’nde Arnavud Belgradı kazâsına tâbi‘ Tümür nâm karye ahâlîsinden ve mahmiye-i mezbûrede Eğrikapı kurbünde sâkin iken bundan akdem vefât eden Hamamcı el-Hâc İbrahim b. Mehmed b. İlyas müvekkilân-ı mezbûr Mehmed’in babası Bâyezid’in babası Hüseyin’in li-ebeveyn karındaşı olup müteveffâ-yı mezbûrûn babası mezbûr İbrahim’in cedd-i a‘lâsı olan mezbûr Hüseyin ile li-ebeveyn karındaşlardır, babaları ismi mezbûr İlyas ve dedeleri ismi Ahmed ve maskat-ı re‘sleri Arnavut Belgradı kazâsına tâbi‘ zikr olunan Tümür karyesinde müteveffâ-yı mezbûrun verâseti zevce-i metrûkesi ile usûbet-i nesebiye cihetinden mezbûr İbrahim’e münhasıradır. Bunlardan gayri vâris ve terekesine müstahakk-ı âhar olduğu ma‘lûmum değildir, ve mezbûr İbrahim dahi müteveffâ-yı mezbûrun medyûnu olan mezbûr Hüseyin’den ve sâir tereke-i müteveffâ-yı mezbûra vâzı‘ü’l-yed olanlardan hisse-i ırsiye-i şer‘iyyelerini taleb ve da‘vâ ve ahz u kabza ve kendülere îsâl ve teslîme ve lede’l-iktizâ sulh ve ibrâya ve bunlar mütevakkıf olduğu umûrun küllîsine taraflarından bizim huzûrumuzda işbu müdde‘î-i mezbûr Mustafa’yı vekîl ve nâib-i menâb nasb u ta‘yîn eylediklerinde ol dahi kabûl etmekle hâlâ meblağ-ı merkūm yüz guruşdan müvekkil-i mezbûrun hisse-i ırsiye-i şer‘iyyesi olan yetmiş beş guruş ve sâir tereke-i müteveffâ-yı merkūma vâzı‘ü’l-yed olanlardan müvekkile-i mezbûrun hisse-i ırsiye-i şer‘iyyesini mezbûr Hüseyin’den ve sâirlerinden bi’l-vekâle hakk-ı taleb ve ahz vardır. Biz bu husûsa bu vech üzere şâhidleriz, şehâdet dahi ederiz, deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibince ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-şehri Recebi’l-ferd li-sene sitte aşere ve mi’e ve elf. Şuhûdü’l-hâl: Küçük Ali Beşe b. Hüseyin, Salih b. Hüseyin, Abbas Beşe b. Zeynel, İsa beşe b. Zeynel, el-Hâc Yusuf b. Osman.