Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 512 Hüküm no: 536 Orijinal metin no: [132a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panaki v. Panayot’un eşinin alacak davasında iddiasının geçersiz olduğu hakkında terkin edilmiş kayıt Bâ-imzâ-i Hazret-i veliyyü’n-ni‘am. Bu hüccetde sehv-i kalem vâki‘ olmağla üç varak aşağıda tekrâr kaydolmuşdur. << Mahrûse-i Edirne’de Kafeskapısı kurbünde Kacanos mahâllesinde sâkin iken bundan akdem hâlik olan Yanaki v. Panayot nâm zimmînin verâseti zevce-i metrûkesi Anastaş bt. Vasil v. Yovan nâm Nasrâniye ile [Balaşa’ya] münhasıra olduğu lede’ş-şer‘ zâhir ve müte‘ayyin oldukdan sonra mahmiye-i İstanbul’da Fenerkapısı dâhilinde sâkine mezbûre Anastaş tarafından husûs-ı âti’l-beyana vekîl olup zât-ı mezbûreyi ma‘rifet-i şer‘iyye ile ârifân Dimitri v. İstimat ve Yanaki v. Tanaş nâm zimmîler şehâdetleriyle hasm-ı câhid-i câ’i’z-zikr muvâcehesinde şer‘an vekâleti sâbite ve sübût-ı vekâletine hükm-i şer‘î lâhık olan İstefani v. Nikifor nâm zimmî mahmiye-i mezbûrede meclis-i şer‘de kuyumcu tâifesinden işbu râfi‘ü’s-sifr Yorgi v. Sofyanoz nâm zimmî muvâcehesinde üzerine da‘vâ ve takrîr-i kelâm edip mezbûr Yorgi hâlik-i mezbûrûn terekesinden bir kırmızı meşin kese içinde malı olan sekiz yüz elli Efrencî altını hâlik-i mezbûrûn helâkinden sonra bi-gayrı hakkın ahz u istihlâk etmekle meblağ-ı mezbûrun dört yüz yirmi beş altınını bundan akdem mezbûr Yorgi bi-tarîkı’d-damân müvekkilem mezbûre ile mezbûre Balaşa’ya edâ ve teslîm mezbûretân dahi bi-kadri’l-hısas merkūm Yorgi yedinden ahz u kabz edip dört yüz yirmi beş altını bâkī kalmakla hâlâ meblağ-ı bâkī-i mezbûrdan müvekkilem mezbûrenin rub‘ hissesine isâbet eden yüz altı altın ile altmış beş akçeyi bi-tarîkı’d-damân mezbûr Yorgi’den taleb ederim suâl olunsun dedikde gıbbe’s-suâl mezbûr Yorgi cevâbında müvekkilem mezbûre Anastaş’a kabzını mu‘terif olduğu meblağ-ı mezbûr dört yüz yirmi beş altından mâ‘adâsı olan meblağ-ı mezbûr yirmi beş eşrefî altından rub‘ hissesine isâbet eden meblağ-ı mezbûr yüz altı altın ile altmış beş akçeyi işbu yedimde olan bir kıt‘a ibrâ hücceti nâtık olduğu üzere bin yüz on beş senesi Saferi’l-hayr’ın dokuzuncu günü mahrûse-i mezbûrede bâb nâibi olan Kemaleddin Efendi b. Mehmed b. Ahmed huzûrunda benden ba‘de’d-da‘vâ vesâtet-i muslihîn ile da‘vâ-i mezkûresinden benimle elli guruş kıymetli bir sîm haydâr[î] raht üzerine sulh oldukda ben dahi sulh-ı mezbûru kabûl ve bedel-i sulh olan mârrü’z-zikr sîm rahtı vekîl-i şer‘îsi Sakar v. Dimitraşki v. Nikola yediyle benden ahz u kabz edip husûs-ı mezbûra müte‘allıka âmme-i da‘vâ ve kâffe-i mutâlebâttan zimmetimi ibrâ’-i âmm-ı kātı‘ü’n-nizâ‘la ibrâ ve iskāt eyleyip bu vech üzere meblağ-ı mezbûr mutâlebesinden zimmetim berî olmuşdur deyü da‘vâ def‘ ve târîh-i mezkûr ile müverraha ve mûmâ-ileyh kıbelinden mümzâ ve hatemi hâvî ve mazmûnu min-külli’l-vücûh takrîr-i meşrûhuna mutâbık bir kıt‘a ibrâ hücceti ibrâz ve istintâk olundukda vekîl-i müdde‘î-i mezbûr İstefani mazmûn-ı hüccet-i mezkûreyi bi’l-külliye inkâr edicek mezbûr Kuyumcu Yorgi’den takrîr-i meşrûhuna mutâbıka beyyine taleb olundukda udûl-i ahrâr-ı ricâl-i Müslimînden ve hüccet-i mezkûrenin zeylinden mastûrü’l-ism olup medîne-i Hazret-i Ebâ Eyyûbe’l-ensârî’de [132b] Surûrî mahâllesinde sâkin İsmail Çelebi b. Mustafa ve el-Hâc Hüseyin b. Ömer nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ müvekkile-i mezbûre Anastaş bt. Vasil v. Yuvan nâm Nasrâniye zikri mürûr eden bin yüz on beş sene[si] Saferi’l-hayr’ın dokuzuncu günü mahrûse-i mezbûrede nâibü’ş-şer olan mezbûr Kemaleddin Efendi b. Mehmed b. Ahmed huzûrunda meblağ-ı bâkī-i mezbûrdan rub‘ hissesine isâbet eden meblağ-ı mezbûr yüz elli eşrefî altın ile altmış akçeyi merkūm Kuyumcu Yorgi’den ba‘de’d-da‘vâ vesâtet-i muslihîn ile da‘vâ-i mezkûresinden elli guruş kıymetli bir sîm haydârî raht üzerine bizim huzûrumuzda sulh oldukda ol dahi sulh-ı mezbûru kabûl ve bedel-i sulh olan mârrü’z-zikr rahtı müvekkil-i şer‘îsi mezbûr Hürmüz v. Dimitraşki v. Nikola yediyle yine bizim muvâcehemizde ba‘de’l-ahz ve’l-kabz husûs-ı mezbûra müte‘allıka âmme-i da‘vâ ve kâffe-i mutâlebâttan müvekkile-i mezbûre Anaştaş’a merkūm Yorgi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledikden sonra hâkim-i mûmâ-ileyh kıbelinden imzâ ve hatemini hâvî işbu bir kıt‘a ibrâ hücceti mezbûr Kuyumcu Yorgi yedine i‘tâ olunmuşdur. Mazmûn-ı hüccet-i mezbûra biz bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eyledikde gıbbe’t-tasdîk ve’t-tezkiye şehâdetleri makbûle olmağın mûcibince ba‘de’l-hükm müvekkile-i mezbûre ber-vech-i muharrer bî-vech-i mu‘âraza men‘ olunmak üzere müvekkile-i müdde‘î-i mezbûra tenbîh birle mâ-hüve’l-vâki‘ bi‘t-taleb ketb olundu. Fi’l-yevmi’l-hâmis ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Sandalcızâde İsmail Efendi, Süleyman Ağa b. Bekir, Muslı Çelebi b. Abid, Halil Çelebi b. Abdullah, Mustafa Çelebi kafesdar?, Abdullah Çelebi kafesdar?, Mustafa Çelebi [b.] Fethi?)>>