Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 514 Hüküm no: 537 Orijinal metin no: [132b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emrullah b. Halil’in, hanesini basan Cafer b. Hüseyin ile ilgili davasında sulh olduğu Bâ-imzâ-i Hazret efendi. Mahrûse-i Galata muzâfâtından kasaba-i Kasımpaşa mahâllâtından İbâdullah mahâllesi sâkinelerinden Fâtıma bt. Osman nâm hatunun zevci olup nefsinden asil ve zevcesi mezbûre Fâtıma Hatun tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iye ile ârifân Ahmed Ağa b. Mustafa ve Hasan Bey b. Ahmed şehâdetleriyle şer‘ân sâbit olan Emrullah b. Halil mahmiye-i İstanbul’da meclis-i şer‘de işbu râfi‘ü’l-vesîka Cafer b. el-Hâc Hüseyin mahzarında ikrâr-ı tam ve takrîr-i kelâm edip işbu mezbûr Cafer bundan akdem sende hakkım vardır, ver deyü gece ile zevcem mezbûre ile ma‘an sâkin olduğum menzile gelip hakkımı ver deyü benimle kavga edip sizi basdırıp zindana vaz‘ ederin deyü tahvîf etmekle havfından nâşî zevcem mezbûre Fâtıma Hatun müstebînü’l-hilka bir cenîn-i meyyit iltimâ etmeğin mûcib-i şer‘îsini mezbûr Cafer’den taleb ve da‘vâ üzere idik. El-hâletü hâzihi da‘vâ-i mezkûremizden fâriğ olup husûs-ı mezbûra müte‘allıka âmme-i da‘vâ ve kâffe-i mutâlebâtdan bi’l-asâle ve bi’l-vekâle işbu mezbûr Cafer’in zimmetini ibrâ ve iskāt eyledim, min-ba‘d mezbûr Cafer ile husûs-ı mezbûra müte‘allıka vechen mine’l-vücûh aslâ da‘vâ ve nizâ‘ımız yokdur, dedikde gıbbe’t-tasdîkı’ş-şer‘î mâ-vaka‘a bi’t-taleb [ketb] olundu. Fî-gurreti Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: İbrahim Beşe b. Süleyman el-mübâşir, Ali Efendi b. Mehmed, el-Hâc Mehmed Efendi b. Ahmed, İsmail Efendi el-kādı, Ömer Efendi el-kādı, Veli Efendi el-kādı.